Bilim jáne ǵylym ministri Ashat Aimaǵambetov Memleket basshysy Qasym-Jomart Toqaevtyń Qazaqstan halqyna kezekti Joldaýy týraly pikir bildirdi. "Ult portaly" ministr sóziniń tolyq mátinin oqyrman nazaryna usynady.
***
Memleket basshysy Qasym-Jomart Kemeluly Toqaev Qazaqstan halqyna Joldaýyn jariia etti.
El Prezidenti memlekettiń tiimdiligi jáne azamattardyń ál-aýqatyn arttyrýǵa baǵyttalǵan bastamalar men mindetterdi atap ótti.
Qasym-Jomart Kemeluly bilim jáne ǵylym salasy boiynsha da birqatar mańyzdy ári ózekti mindetter júktedi.
Prezident Joldaýynda kózdelgen tapsyrmalardyń ýaqytyly jáne sapaly oryndalýyn qamtamasyz etý úshin barlyq qajetti shara qabyldanatyn bolady.
Joldaýda aitylǵandai, ýrbanizatsiia jáne demografiialyq protsesterge bailanysty 2025 jyly mektepterde qosymsha shamamen 1 mln oryn qajet bolady.
Bul máseleni sheshý úshin 1 myń jańa mektep salynady. Osy jyldyń ózinde 200 mektepti ashý josparlanyp otyr.
Ákimdiktermen birlesip 4 tetik paidalanylatyn bolady. Atap aitsaq, memlekettik-jekemenshik áriptestik, jeke mektepter jelisin damytý, memlekettik biýdjetten nysanaly qurylys jáne modýldik konstrýktsiialardan mektepter salý.
Oqýshylardyń bilimindegi olqylyqtardyń ornyn toltyrý jáne oqý baǵdarlamalaryn beiimdeý boiynsha sharalar josparlanǵan.
Sonymen qatar 5 myń mektepti modernizatsiialaý, pándik kabinettermen jabdyqtaý, qosymsha bilim berýge memlekettik tapsyrys bólý josparda bar.
Pedagogterdiń biliktiligin arttyrýǵa erekshe nazar aýdarylatyn bolady. Álem qaryshtap damyp kele jatqan jaǵdaida bul óte mańyzdy. Muǵalimderdiń biliktiligin qazirgidei bes jylda bir ret emes, úsh jylda keminde bir ret arttyrý kózdeletin bolady. Prezident sondai-aq pedagogterdi tegin kýrstarmen tolyq qamtamasyz etý qajettiligi týraly málimdedi.
Memleket basshysy áleýmettik osal toptaǵy balalardy qoldaýǵa erekshe kóńil bóldi. Olarǵa «Tsifrlyq tálimger» jobasy aiasynda qosymsha sabaqtar alý múmkindigi beriledi.
Qashyqtan oqytýǵa qaramastan, bizdiń oqýshylarymyz álemdik shyńdardy baǵyndyryp, Halyqaralyq olimpiadalarda ótken jyldardaǵy rekordtaryn jańartty.
Daryndy balalardy qoldaý úshin Prezidenttiń tapsyrmasyna sáikes konkýrsqa qatyspai-aq granttar berý, sondai-aq birjolǵy aqshalai syilyqaqylar kózdeletin bolady: altyn medal úshin keminde 1500 AEK, kúmis medal – 1000 AEK, qola medal – 500 AEK usynylady.
Sonymen birge halyqaralyq olimpiadalardyń júldegerlerin daiyndaǵan pedagogterdi qoldaý sharalary kózdeletin bolady.
Suranysqa ie mamandyqtar boiynsha jastarǵa tehnikalyq jáne kásiptik bilim alý úshin kolledjderde tegin oqytý múmkindigi keńeitiledi («Jas talap» jobasy).
Prezident sondai-aq tolyq jinaqtalǵan aýyl mektepterin jan basyna shaqqandaǵy qarjylandyrýǵa kezeń-kezeńmen kóshirý jóninde sharalar qabyldaýdy tapsyrdy.
Esterińizge sala keteiin, 2020 jyldan bastap barlyq qalalyq mektep jan basyna qarjylandyrýǵa kóshti. Bul shara ártúrli óńirlerde qarjylandyrýdy teńestirý, materialdyq-tehnikalyq bazany jaqsartý, alym-salyqtarmen bailanysty táýekelderdi edáýir tómendetý, mektepterdiń qarjylyq derbestigin arttyrý jáne biýdjet qarajatyn jumsaý tiimdiligin jaqsartýǵa múmkindik berdi. Bul bastama bilim berý jáne jekemenshik mektepter ashýǵa jeke investitsiialardy tartýdy yntalandyrdy.
Aita keteiin, ǵylym salasynda da eleýli ózgerister bolmaq.
Memleket basshysy jyl sońyna deiin Ǵylym týraly zańnamaǵa ózgerister engizýdi tapsyrdy. Túzetýler ǵalymdarymyz turaqty jáne laiyqty eńbekaqy alýyn qamtamasyz etýge baǵyttalýy tiis. Ol úshin jetekshi ǵalymdardyń jalaqysy bazalyq qarjylandyrýǵa qosylýy kerek.
Sonymen qatar irikteý jáne qarjylandyrýdyń naqty ári ashyq kriteriileri men Erejeleriniń negizinde irgeli zertteýlermen ainalysatyn ǵylymi institýttardy tikelei qarjylandyrýdy engizý qajet.
Ǵalymdarymyz kóterip kele jatqan másele – ǵylymi-zertteý jumystaryn (ǴZJ) qarjylandyrý merzimderin uzartý problemasy óz sheshimin tabady. ǴZJ granttyq qarjylandyrý merzimi úsh jyldan bes jylǵa deiin ulǵaitylýy tiis.
Ǵalymdardy tolǵandyryp júrgen taǵy bir másele – Ǵylym týraly zań jobasynda qarastyrylatyn Ulttyq ǵylymi keńesiniń sheshimderine shaǵymdaný institýtyn engizý.
Biz Prezidenttiń Qazaqstan halqyna Joldaýynda qoiylǵan barlyq mindetti iske asyrý úshin josparly jáne júieli jumysty oryndaityn bolamyz.
