Muǵalimderdiń balalaryna balabaqshaǵa birinshi kezekte oryn beriledi. Bul týraly búgin Úkimet otyrysynda «Pedagog mártebesi týraly» zań jobasyn tanystyrǵan QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Elbasy Nursultan Nazarbaevtyń tapsyrmasy aiasynda ministrlik «Pedagog mártebesi týraly» jáne «Keibir zańnamalyq aktilerge pedagog mártebesi, muǵalim men oqýshyǵa júktemeni tómendetý máselesi boiynsha ózgerister men tolyqtyrýlar engizý týraly» zań jobalaryn ázirledi. Zań jobalaryn ázirleý kezinde arnaýly jumys toby quryldy. Olar elimizdiń barlyq aimaǵynda pedagog qaýymmen kezdesti. Osy aralyqta jalpy 18 myńnan astam usynys taldandy. Barlyq usynystar muǵalimder men saraptamalyq qoǵamdastyqpen keńinen talqylanyp ótti. Sondai-aq, áleýmettik jelilerde 5 tikelei transliatsiia ótkizildi», - dedi ol.
Ministrdiń atap ótýinshe, zań jobalaryn daiyndaý barysynda pedagogikalyq qyzmetti retteýdiń halyqaralyq tájiribesi eskerildi. Atap aitqanda birqatar shet eldiń zańdary, IýNESKO-nyń muǵalimderdiń jaǵdaiy týraly usynystary qarastyryldy.
«Pedagog mártebesi týraly» zań jobasy 19-baptan turady. Al qosymsha zań jobasy 192-bapty qamtidy. Jalpy zań jobasy aýqymdy 5 baǵyttan turady. Atap aitqanda, materialdyq jáne materialdyq emes yntalandyrý, áleýmettik kepildikter, ustazdardyń quqyqtaryn keńeitý, muǵalimderdiń júktemesin azaitý. Materialdyq emes yntalandyrýǵa keler bolsaq, olar muǵalimderdiń júktemesin tómendetý, ar-namysy men qadir-qasietin qorǵaý kepildigi, muǵalimderdiń balalaryna balabaqshaǵa birinshi kezekte oryn berý, Qazaqstannyń eńbek sińirgen ustazy memlekettik nagradasyn berý, taǵy basqa da materialdyq emes yntalandyrýlar qarastyrylǵan», - dedi ol.
Ministrdiń aitýynsha, muǵalimderdiń kásibi quqyqtary keńeitildi. Máselen, oqytý men tárbieleýdiń avtorlyq ádisterin ázirleý jáne qoldaný, oqý quraldaryn tańdaý, aqparattyq resýrstardy tegin qoldaný, biliktilikti arttyrý kýrstaryn ózderi tańdaý quqyqtary berilip otyr.
«Sailaný jáne sailanbaly laýazymdarǵa ornalasýdyń jańa quqyqtary da engizildi. Bul sharalardyń barlyǵy muǵalimderdiń jeke damýyna jáne oqý protsesin jetildirýge múmkindik jasaidy dep senemiz», - dedi A.Aimaǵambetov.
