«Pedagog mártebesi týraly» zań jobasynda ustazdarǵa birneshe qosymsha aqy tóleý qarastyrylǵan. Bul týraly búgin Úkimet otyrysynda atalǵan zań jobasyn tanystyrǵan QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Negizgi materialdyq yntalandyrýǵa keler bolsaq, onyń ishinde synyp jetekshiligi men dápterlerdi teksergeni úshin aqyny eki ese ósirý jáne pedagogterge pedagogikalyq sheberligi úshin qosymsha aqy tóleý qarastyrylǵan. Sonymen qatar zań jobasynda barlyq pedagogter úshin demalys ýaqytyn 56 kúnge deiin ulǵaitý qarastyryldy. Magistr dárejesi úshin jáne tálimger bolǵany úshin qosymsha aqy tóleý jáne taǵy da basqa sharalar qarastyrylyp otyr. Eń bastysy, Memleket basshysynyń tapsyrmasyna sáikes, 4 jyldyń ishinde jalaqyny 2 ese ósirý boiynsha másele qarastyryldy», - dedi ol.
Ministrdiń aitýynsha, joǵaryda atalǵan birqatar normalardy iske asyrý aiasynda qosymsha zań jobasy ázirlendi. Atalǵan zań jobasymen úsh kodekske, 15 zańǵa tolyqtyrýlar men ózgertýler engiziledi.
«Atalǵan zań normalary muǵalimderge kelesidei múmkindik beretin bolady: synyp jetekshiligi úshin 173 myń muǵalimniń, al dápterlerdi teksergeni úshin 165 myń muǵalimniń qosymsha aqysy eki esege kóbeiedi. 212 myńnan astam qyzmetkerdiń biliktilik sanaty úshin ailyq jalaqydan 30-dan 50 paiyzǵa deiingi mólsherde qosymsha aqy alýyna múmkindik beriledi. 7 myń qyzmetkerdiń magistr dárejesi úshin 10 AEK mólsherinde qosymsha aqy alýyna múmkindik jasalady. 18 myń qyzmetkerdiń tálimgerligi úshin 1 bazalyq laýazymdyq mólsherinde qosymsha aqy alýyna múmkindik beriledi dep kútilýde. Sondai-aq 100 myńnan astam pedagog qosymsha 14 kún jazǵy demalys alyp, endi 56 kún demalatyn bolady», - dedi Ashat Aimaǵambetov.
