«Pedagog mártebesi týraly» zań jobasy muǵalimderdiń abyroiyn arttyrýǵa múmkindik beredi. Bul týraly búgin atalǵan zań jobasy talqylanǵan Úkimet otyrysynda QR Premer-Ministriniń orynbasary Berdibek Saparbaev aitty, dep habarlaidy QazAqparat.
«Elimizde tuńǵysh ret daiyndalǵan zań jobasy muǵalimderdiń bedelin, abyroiyn arttyrýǵa úlken múmkindik beredi. Eń negizgisi olardy qosymsha jumysqa yntalandyratyn bolady. Ministr Ashat Qanatuly (Bilim ministri Aimaǵambetov) aitqandai, bul zań jobasy elimizde qyzý talqylandy. Onyń ústine Memleket basshysy Qasym-Jomart Toqaev qatysqan tamyz keńesinde de úlken qoldaý tapty. Jalpy, boljam boiynsha osy zań jobasy eń keminde elimizde 500 myńǵa jýyq ustazdyń múddesin qorǵaidy», - dedi Berdibek Saparbaev.
Sonymen qatar ol «Pedagog mártebesi týraly» zań jobasy qarjymen tolyq qamtamasyz etilgenin aitty.
«Úsh jylǵa 930 mlrd teńgege jýyq qarjy qaralǵan. 50 jyldyń ishinde alǵash ret muǵalimderge tálimgerligi úshin, magistr ataǵy úshin qosymsha aqy tólenetin bolady. Endi ministrliktiń negizgi mindeti - osy zań jobasyn der kezinde Parlamentte qorǵap, tezirek júzege asýyn qamtamasyz etý. Zań qabyldanǵannan keiin mánin, maqsatyn halyqqa túsindirip aitýymyz kerek», - dedi Úkimet basshysynyń orynbasary.
