«پەداگوگ مەرتەبەسٸ تۋرالى» زاڭ جوباسى مۇعالٸمدەردٸڭ ابىرويىن ارتتىرۋعا مٷمكٸندٸك بەرەدٸ. بۇل تۋرالى بٷگٸن اتالعان زاڭ جوباسى تالقىلانعان ٷكٸمەت وتىرىسىندا قر پرەمەر-مينيسترٸنٸڭ ورىنباسارى بەردٸبەك ساپارباەۆ ايتتى, دەپ حابارلايدى قازاقپارات.
«ەلٸمٸزدە تۇڭعىش رەت دايىندالعان زاڭ جوباسى مۇعالٸمدەردٸڭ بەدەلٸن, ابىرويىن ارتتىرۋعا ٷلكەن مٷمكٸندٸك بەرەدٸ. ەڭ نەگٸزگٸسٸ ولاردى قوسىمشا جۇمىسقا ىنتالاندىراتىن بولادى. مينيستر اسحات قاناتۇلى (بٸلٸم مينيسترٸ ايماعامبەتوۆ) ايتقانداي, بۇل زاڭ جوباسى ەلٸمٸزدە قىزۋ تالقىلاندى. ونىڭ ٷستٸنە مەملەكەت باسشىسى قاسىم-جومارت توقاەۆ قاتىسقان تامىز كەڭەسٸندە دە ٷلكەن قولداۋ تاپتى. جالپى, بولجام بويىنشا وسى زاڭ جوباسى ەڭ كەمٸندە ەلٸمٸزدە 500 مىڭعا جۋىق ۇستازدىڭ مٷددەسٸن قورعايدى», - دەدٸ بەردٸبەك ساپارباەۆ.
سونىمەن قاتار ول «پەداگوگ مەرتەبەسٸ تۋرالى» زاڭ جوباسى قارجىمەن تولىق قامتاماسىز ەتٸلگەنٸن ايتتى.
«ٷش جىلعا 930 ملرد تەڭگەگە جۋىق قارجى قارالعان. 50 جىلدىڭ ٸشٸندە العاش رەت مۇعالٸمدەرگە تەلٸمگەرلٸگٸ ٷشٸن, ماگيستر اتاعى ٷشٸن قوسىمشا اقى تٶلەنەتٸن بولادى. ەندٸ مينيسترلٸكتٸڭ نەگٸزگٸ مٸندەتٸ - وسى زاڭ جوباسىن دەر كەزٸندە پارلامەنتتە قورعاپ, تەزٸرەك جٷزەگە اسۋىن قامتاماسىز ەتۋ. زاڭ قابىلدانعاننان كەيٸن مەنٸن, ماقساتىن حالىققا تٷسٸندٸرٸپ ايتۋىمىز كەرەك», - دەدٸ ٷكٸمەت باسشىسىنىڭ ورىنباسارى.
