«Habar» arnasyndaǵy «Ashyq dialog» baǵdarlamasynda QR Aqparat jáne qoǵamdyq damý ministri Dáýren Abaev óziniń synyp jetekshilerin eske aldy, dep habarlaidy QazAqparat.
«Árine, bilim berý máselesi azamattar úshin árqashan basym másele bolyp sanalady. Úkimettiń sońǵy otyrysynda biz «Pedagog mártebesi týraly» zań jobasymen tanystyq. QR Bilim jáne ǵylym ministrligi úlken jumys atqarǵanyn atap ótkim keledi. Usynylyp otyrǵan jańashyldyqtardy muǵalimder de, ata-analar da, oqýshylar da jaǵymdy qabyldaitynyna senimdimin», - degen ministr zań jobasynyń eń mańyzdy tustaryna toqtaldy.
«Synyp jetekshiligi úshin eki ese aqy tólenetin bolady. Synyp jetekshisi bolý jai ǵana sabaq berýden áldeqaida qiyn ekenine bári kelisedi dep oilaimyn. Bul - balany tárbieleý, onyń boiyna durys qundylyqtar men ómirlik baǵyttar sińirý, eń qiyn jaǵdailarda oqýshynyń qasynan tabylyp, oqýshynyń barlyq kemshilikterine muǵalimdi kinálaýǵa daiyn turatyn ata-anamen udaiy bailanysta bolý degen sóz. Aitpaqshy, meniń synyp jetekshilerim bolǵan Erke Hanáýletqyzy men Gúlnár Ábdirazaqqyzynyń aty-jónderi áli esimde», - dedi vedomostvo basshysy.
Dáýren Abaev ustazdyq mamandyqtyń qazir básekege sai bolmai turǵanyn da atap ótti.
«Barlyq pedagogtardyń eńbek demalysy 56 kúnge kóbeitildi. Taǵy bir yntalandyratyn dúnie – magistrlik sanaty men tálimgerlik úshin qosymsha aqy tólenýi. Zań jobasynda muǵalimderdiń júktemesin azaitý, olardyń abyroi-bedelin qorǵaý qarastyrylǵany óte mańyzdy. Ustazdarǵa balabaqsha kezeginde birinshi bolý quqyǵyn berý usynylyp otyr. Sharalar munymen shektelmeidi. Bul zań jobasy áli Parlament qabyrǵasynda talqylanady. Sondyqtan qujattyń áli óz kúshin arttyra túsetinine senimdimin. Óitkeni, pedagog mamandyǵy básekege qabiletsiz bolyp ketkenin bárimiz túsinemiz. Eńbekaqy tómen, júkteme aýyr, qaǵazbastylyq, osynyń bári mektepterde myqty mamandardyń toqtamaýyna ákelip jatyr. Taptaýryn bolyp estilse de aitaiyn, ultymyzdyń bolashaǵy - muǵalimderdiń qolynda. Muhtar Áýezov: «Ustaz – uly esim» dep aitqandai, Bilim jáne ǵylym ministrligi daiyndaǵan sharalar qazirgi jaǵdaidy jetildiretin mańyzdy qadam dep oilaimyn», - dep túiindedi Dáýren Abaev.
