Parlament Májilisiniń jalpy otyrysynda «Qazaqstan Respýblikasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy "Ult aqparat".
Zań jobasy Parlament Májilisi depýtattarynyń bastamasy boiynsha qabyldanǵan zańdardy, Memleket basshysynyń Joldaýda bergen tapsyrmalaryn iske asyrý úshin ázirlendi. Birqatar quqyq buzýshylyq quramy boiynsha azamattar men zańdy tulǵalardyń quqyqtary men zańdy múddelerin qorǵaý maqsatynda kináli tulǵalardy jaýapqa tartý tártibin reglamentteý jónindegi mańyzdy mindetti sheshedi.
«Tekserýlerdi, sondai-aq baqylaý men qadaǵalaýdyń ózge de nysandaryn zańsyz júrgizý faktileri boiynsha memlekettik organdardyń laýazymdy adamdarynyń jaýaptylyǵyn kúsheitý maqsatynda olardy ákimshilik jaýaptylyqqa tartý merzimin bir jylǵa deiin ulǵaitý usynyldy. Qazir bul merzim eki aidy quraidy. Tájiribe kórsetip otyrǵandai, bul da jazanyń bultartpastyǵy qaǵidatyn eleýli túrde joiady. Mundaǵy másele – tekserý nátijelerine, memlekettik qyzmetkerlerdiń áreketterine shaǵymdaný protsesiniń uzaq ýaqytty alýy bolyp otyr. Nátijesinde, eki ailyq merzimniń ótýine bailanysty kináli sheneýnikter jazalanbai qalýda», - dep túsindirdi depýtat Gúlnar Bijanova.
Budan bólek G. Bijanova qaýipti óndiristik obektilerge zańsyz kirýge jáne quramynda altyn bar kenderdi zańsyz óndirýge bailanysty problemalar uzaq ýaqyt boiy oryn alyp otyrǵanyn atap ótti.
«Memleket pen biznestiń ekonomikasy zardap shegip, adamdardyń ómiri men densaýlyǵyna ziian kelýde. Bul kúzetiletin obektige zańsyz kirgeni úshin qylmystyq jaýaptylyq engizýge bastama jasaýy úshin negiz boldy. Osyǵan bailanysty Kodekstiń 506-nshy babynyń dispozitsiiasyna ákimshilik jáne qylmystyq jaýaptylyq ara-jigin ajyratý úshin naqtylaý engiziledi», - dedi depýtat.
Sonymen qatar, joba gazdy alaý etip jáne statsionarlyq kózderde zańsyz jaqqany úshin ekologiialyq aiyppuldy esepteýge birdei bazany qoldaný týraly túzetýdi kózdeidi. Bul ekologiialyq aiyppuldardy esepteý kezinde kemsitýshilik tásildi bolǵyzbaidy. El Prezidentiniń aiyppuldy esepteý kezinde osyndai tásildi joiý týraly qoiǵan mindeti sheshiledi.
Budan buryn habarlanǵandai, qujat aiasynda prokýrordyń qaýlysyn oryndamaǵany úshin jaýapkershilik belgilenedi.
