Májilis tóraǵasy Nurlan Nyǵmatýlin erekshe qorǵalatyn tabiǵi aýmaqtar máseleleri boiynsha ózgerister men tolyqtyrýlar engizý týraly zań jobasynyń negizgi maqsatyn atady, dep habarlaidy QazAqparat tilshisi.
Aita ketsek, Parlament Májilisinde keibir zańnamalyq aktilerge erekshe qorǵalatyn tabiǵi aýmaqtar máseleleri boiynsha ózgerister men tolyqtyrýlar engizý týraly» zańynyń jobasy tanystyrylǵan bolatyn. Zań jobasynyń negizgi maqsaty – buryn týrizm nysandary men erekshe strategiialyq mańyzy bar qurylystardy (sý sharýashylyǵy qurylysjailary, Memlekettik shekara obektileri, qorǵanys muqtajy) salý jáne olardyń jumys isteýi úshin shyǵarylǵan, maqsaty boiynsha paidalanylmaityn jerdi erekshe qorǵalatyn tabiǵi aýmaqtar jerine qaitarý bolyp otyr.
«Búgin biz óte mańyzdy zań jobasyn qabyldadyq. Ony áriptesterimiz – Májilis depýtattary ázirledi. Ol erekshe qorǵalatyn tabiǵi aýmaqtar júiesin quqyqtyq retteýdegi kemshilikterdi joiady. Osy zań jobasynyń arqasynda keibir jerdi, onyń ishinde maqsatty túrde paidalanylmai jatqan jerdi erekshe qorǵalatyn tabiǵi aýmaqtar qataryna qaitarý protsesin jeńildetedi. Ol jumys óte mańyzdy. Ózderińiz biletindei, el basshylyǵy maqsatty túrde paidalanylmai jatqan jerdi memleket menshigine qaitarý máselesin birneshe márte kótergen bolatyn. Osy zań jobasynyń normalary – jedeldetilgen formatta osynaý mańyzdy máseleni tezirek sheshýge kómektesedi», - dedi Májilis tóraǵasy Nurlan Nyǵmatýlin.
Onyń aitýynsha osylaisha erekshe qorǵalatyn tabiǵi aýmaqtardy saqtap qalýǵa múmkindik zor.
«Jalpy aitqanda, osy zań jobasynyń basty maqsaty - erekshe qorǵalatyn tabiǵi aýmaqtardy tiisti deńgeide quqyqtyq turǵyda qamtamasyz etý. Bul – tabiǵi aimaqtardy odan ary nyǵaitýǵa, sonymen birge ulttyq ekonomikany damytýǵa yqpal etetin bolady», - dedi ol.
