Pavlodar, Omby, Túmen oblystarynyń týristik firmalary, sondai-aq Sverdlov oblysyna kókónis, et, jarma satýshylar Petropavl qalasynda ótken shekaralyq yntymaqtastyq forýmynda áriptestik týraly memorandým jasasty, dep habarlaidy QazAqparat.
«Pavlodarlyq áriptesterimizben memorandým jasalǵan soń, biz Pavlodar oblysy boiynsha týrlar uiymdastyramyz. Bizdi aimaqtyń basty kórikti jerleri men emdeý-kýrorttyq baǵyty qyzyqtyrýda. Pavlodarlyqtar men túmendikter arasynda jasalǵan taǵy bir kelisim týrizm, ekskýrsiialyq jáne kórme-jármeńkelik jumysta iskerlik bailanystardy nyǵaitýdy kózdep otyr», - dep málimdedi Petropavlda ótken XV Qazaqstan-Resei shekaralyq yntymaqtastyq forýmynda Túmen qalasyndaǵy «Kontinent» JShQ ókili Aleksandr Omelchenko.
Pavlodar oblysy ákimdigi baspasóz qyzmetiniń habarlaýynsha, pavlodarlyq týristik operatorlar da Túmen oblysyndaǵy áriptesterimen yntymaqtastyq týraly memorandýmdar jasasqan. Barlyq máseleler boiynsha tolyq ózara árekettestikti qarastyratyn qujatqa pavlodarlyq «Roman Týr» kompaniiasynyń direktory Igor Chernyh pen Túmendegi «Kontinent» JShQ ókili Aleksandr Omelchenko qol qoidy.
«Naryqta 17 jyldan beri qyzmet etip kelemiz, osy ýaqyt boiy túmendikterdi Qazaqstanǵa jetkizip júrmiz. Bizdiń basty baǵyttarymyz - Aqmola oblysyndaǵy Býrabai men Shýche, Astana qalasy men Qaraǵandy oblysy», - dedi A.Omelchenko.
Petropavldaǵy forým kezinde Pavlodar oblysyndaǵy taýar satý jáne qyzmet kórsetý ortalyǵynyń basshysy Dmitrii Korepanov pen reseilik «Pro» kompaniialar tobynyń bas direktory da yntymaqtastyq týraly memorandýmǵa qol qoidy. Taraptar pavlodarlyq óndirýshilerdiń Sverdlov oblysyna aýylsharýashylyq ónimderin jetkizetini jóninde kelisken.
«Kókónisterdiń alǵashqy partiiasy kóp uzamai jetkiziledi. Bolashaqta pavlodarlyqtar seriktesterine et pen jarmany jetkize alady», - dep atap ótti Pavlodar oblysy ákimdiginiń baspasóz qyzmetinen.
