Foto: ashyq derekkóz
Pavlodarda 12 jasynda sábiin dúniege ákelgen oqýshy ata-anasymen birge turatyn boldy. Biraq qyzdyń otbasy basqa jerge qonys aýdardy, dep habarlaidy "Ult aqparat" Stan.kz aqparat agenttigine silteme jasap.
"Otbasy basqa eldi mekenge kóshedi. Kásipker-metsenattar jáne Mońǵoliiadan kelgen qandastar otbasyna baspana syilady. Olar otbasy músheleri Qazaqstan azamattyǵyn alǵansha qarasýǵa niet bildirdi", – deidi balalar quqyqtary jónindegi aimaqtyq ombýdsmen Sáýle Shákeneva.
Qaiyrymdylyqqa oblystyq máslihattyń depýtaty Asylbek Týǵanbai men onyń kásipker dostary bar bastamashy boldy. Olar jańa týǵan nárestege Tomiris degen esim berdi.
20 shilde kúni bosanǵan jas ana perinataldyq ortalyqta jatyr. Dárigerlerdiń aitýynsha, ana men balanyń qazirgi jaǵdaiy qanaǵattanarlyq. Anasy náresteni bótelkemen tamaqtandyryp júr.
Sondai-aq 12 jastaǵy oqýshy qyrkúiekten bastap mektepke baryp, oqýyn jalǵastyrady. Al perinataldyq ortalyqtan shyqqan soń ata-anasymen birge turady. Alaida qyzdyń otbasy osy ýaqytqa deiin turyp kele jatqan aýyldan basqa jerge qonys aýdarady. Jergilikti depýtat otbasyǵa baspana syilady. Olardyń turǵylyqty jeri boiynsha balalar dárigeri patronaj jasaidy. Al mektep oqýshysynyń psihologiialyq jaǵdaiyn mamandar jiti baqylaýyna aldy.
Otbasynyń jańa týǵan sábidi bóbekter úiine ótkizýine bolar edi. Alaida olar balany ózderi qarap, asyraitynyn aityp, bul usynystan bas tartty. Ombýdsmen bul otbasy jergilikti atqarýshy organdardyń, ýákiletti organdardyń jáne jeke óziniń baqylaýynda bolatynyn aitty.
Eske salaiyq, buǵan deiin Pavlodar oblysy Sharbaqty aýdanynda 19 shildede aýyl mektebinde oqityn 12 jastaǵy qyz bosanǵanyn jazǵanbyz. Óńirdiń bilim berý basqarmasy jaǵdaidy rastady. Mektep oqýshysyn jaqyn týysy zorlaǵan. Jasóspirimniń kesar tiligi arqyly bosanǵany belgili boldy.
