Pavlodarlyq dárigerler eki ret júregi toqtap qalǵan kóp balaly anany aman alyp qaldy, dep habarlaidy "Ult aqparat" Pavlodarnews.kz-ke silteme jasap.
37 jastaǵy júkti áiel Aqsý qalasynyń aýyldyq aimaǵy Eńbek aýylynda turady. Birneshe kún boiy jótel, qaqyryq, álsizdik, keýde qýysynyń aýyrýy, merzimdi tahikardiia mazalaǵan soń aýyl turǵyny halyqtyq emdeý ádisterimen emdelgen.
Tek demikpe paida bolǵan kezde ǵana aýrýhanaǵa júgingen. Sol jerde qan qysymynyń tómendegeni jáne satýratsiia kórsetkishinde qaýip bar ekeni anyqtalǵan.
Bul týraly oblystyq kardiologiialyq ortalyqtyń kardiohirýrgiia bóliminiń meńgerýshisi Murat Raihanov aitty.
– Ony shuǵyl túrde Pavlodar qalasynyń №1 aýrýhanasynyń infektsiialyq statsionaryna jetkizdi, - dep habarlady doktor. – Qabyldaý sátinen bastap jeti minýttan keiin júrek qyzmeti toqtap qaldy, biraq dárigerler bes minýttan keiin júrek yrǵaǵyn qalpyna keltire aldy.
Kompiýterlik tomografiia pnevmoniia diagnozyn rastamady. Degenmen júrektiń ýltradybystyq zertteýi mitraldy qaqpaqshanyń patologiiasyn, mitraldy qaqpaqshanyń aldyńǵy qaqpaǵynyń úzilgenin, 3-4 dárejeli mitraldy qaqpaqshanyń jetkiliksizdigin kórsetti, bul jedel tynys alý jáne júrek jetkiliksizdigine ákeldi.
Dárigerler áieldi shuǵyl túrde kardiologiialyq ortalyqqa aparýdy sheshken.
- Qysym 50-60, tómen satýratsiia, ókpeni jasandy jeldetý apparatyna qosylǵan, komaǵa túsken jáne ókpe isinýi. Naýqas sondai jaǵdaida boldy, – dedi kardioortalyqtyń anesteziologiia bóliminiń meńgerýshisi, oblystyń shtattan tys bas anesteziology Inna Glovatskaia. – Ol ólim aýzynda jatty, naýqasty osyndai aýyr jaǵdaida tasymaldaý qaýipti boldy. Tasymaldaý aldynda aýystyra bastaǵan kezde júregi toqtap qaldy. Reanimatsiialyq sharalardyń 20-minýtynda júregi soǵa bastady, qysym men satýratsiia birtindep joǵarylady. Biz sirenamen kardiologiia ortalyǵyna bet aldyq. Jolda hirýrgterr eskertildi. Júkti áiel jolda ólip ketýi múmkin dep oilaýǵa ýaqyt bolmady. Bar oiym - ony aman alyp qalý edi.
Murat Raihanovtyń aitýynsha, tehnikalyq turǵydan operatsiia aýyr bolmaǵan, bul aýrýhanada mundai operatsiia kópten beri jasalady. Patsienttiń klinikalyq ólim jaǵdaiynda jatqany jáne júkti bolýy jaǵdaidy qiyndatty.
– Biz áieldiń qandai jaǵdaida ákelinetinin bildik, operatsiialyq bólmeni tez arada daiyndap, kelip túskennen keiin birden jasandy qan ainalymdy qosý arqyly operatsiiany bastadyq. Bul onyń ómirin saqtaýǵa kómektesti, - dep kardiohirýrgiia bóliminiń meńgerýshisi eske aldy. - Biraq hirýrgiialyq aralasýdan keiin de jasandy qan ainalymynan shyqqan kezde júrek qyzmeti qalpyna kelmedi, reanimatsiialyq sharalardyń uzaqqa sozylýyna bailanysty júrek álsirep qaldy.
Naýqas ekstrakorporaldy membranalyq oksigenatsiia apparatyna qosyldy. Mundai jabdyq tek kardio ortalyqta ǵana bar, ol júrek pen ókpeni qalpyna keltiýrge kómektesedi.
Pavlodarlyq dárigerler eki ret júrek ustamasynan keiin áiel adamnyń miy tirshilikti toqtatýy múmkin degen qaýippen elordalyq nevrologtarmen birneshe konsiliým ótkizdi.
Operatsiiadan keiingi segizinshi kúni ǵana naýqas esin jinai bastady. Qazir ol ózine keldi, ózdiginen dem alady, súiemeldeýmen turyp, palatada júre alady.
- Ol esin jinap, qalpyna kele bastaǵan kezde qandai kúide bolǵanymyzdy sózben aitý múmkin emes, – deidi oblystyń bas shtattan tys anesteziology.
Dárigerler naýqasty reanimatsiiadan ortalyq bólimine aýystyrýdy josparlap otyr.
– Ókinishke orai, reanimatsiialyq sharalar sharanaǵa áser etpei qoimady, ózdiginen túsik tastaý boldy, - dep tolyqtyrdy Murat Raihanov. - Ananyń jaǵdaiy jaqsy. Eki aýrýhananyń dárigerleriniń komandalyq jumysy jaqsy nátije berdi, barlyǵy tez, saýatty, kásibi jumys jasady.
O dúnieden oralǵan aýyl turǵynynyń kúieýi bes ulynyń fotosýretterimen shaǵyn video túsirip, «Kimniń ómirin qutqarǵandaryńyzdy qarańyz!» degen áserli habarlama jibergen.
