Pavlodar oblysynyń taǵy eki qalasynda pilottyq rejimde «109» qyzmeti iske qosyldy, dep habarlaidy "Ult aqparat".
Óńir ákimdiginen málim etkendei, «109» Biryńǵai bailanys ortalyǵy Pavlodar qalasynda biylǵy naýryz aiynda jumys istei bastaǵan bolatyn. Endi shuǵyl jelige Ekibastuz jáne Aqsý qalalarynyń turǵyndary qońyraý shala alady.
Atalmysh ortalyq telefon arqyly turǵyn úi-kommýnaldyq sipattaǵy jáne ómir súrý sapasyn arttyrýǵa baǵyttalǵan máseleler boiynsha ótinishterdi, shaǵymdardy, usynystardy qabyldaidy.
«Jumys kestesi - 24/7. Operatorlar kommýnaldyq mekemelermen árdaiym tikelei bailanysta. Sol sebepti qabyldanǵan ótinishter jyldam oryndalady. Kezekshi dispetcherler ótinish berýshilermen turaqty bailanysta bolyp, ótinimniń oryndalý sapasyn bilip otyrady.
Endi turǵyn úi-kommýnaldyq sharýashylyq bóliminiń, basqa da kóptegen mekemelerdiń nómirin este saqtaýdyń qajeti joq. Suraqtaryńyz týyndasa, telefon arqyly «109» nómirin terseńiz jetkilikti.
Maýsymnyń sońyna deiin Ekibastuz jáne Aqsý qalalary pilottyq rejimde jumys isteidi. Odan ári júiege aýdandar qosylady», - dedi oblys ákimdiginen.
Málim etilgendei, «109» qyzmeti iske qosylǵannan beri 50 myńnan astam qońyraý qabyldanǵan. Onyń ishinde 45 myńy TJ rejimi, áleýmettik jáne kommýnaldyq tólemaqy, blok beketterden ótý siiaqty konsýltatsiialarǵa bailanysty boldy. Al, kommýnaldyq sala boiynsha 5 myńǵa jýyq ótinish túsken.
