QR Tótenshe jaǵdailar ministrligi Memlekettik órt baqylaý basqarmasynyń basshysy Erlan Tóregeldiev Pavlodardaǵy mektep órtiniń neden shyǵýy múmkinin ekenin aitty, dep habarlaidy QazAqparat.
«Keshegi órt faktisi boiynsha materialdar ázirge tekserilip jatyr. Órttiń aldyn-ala sebebi - elektr quraldaryn, iaǵni standartqa sai kelmeitin elektr uzartqyshtaryn paidalaný kezinde órt qaýipsizdigi erejeleriniń buzylýy. Bul aldyn-ala boljam ǵana. Atalǵan órt faktisi boiynsha qylmystyq is qozǵaldy», - dedi E. Tóregeldiev Ortalyq kommýnikatsiialar qyzmetinde ótken baspasóz máslihatynda.
Respýblikanyń barlyq mektepterin tekserý jóninde spiker jospardan tys tekserý josparlanbaǵanyn atap ótti. Óitkeni syn-qater dárejesin baǵalaý kriteriilerine sáikes, barlyq bilim berý nysandary aqpan-mamyr aralyǵynda tekseriledi.
«Qazirgi ýaqytta barlyq bilim berý nysandarynyń aýmaǵyna, qabatyna qaramastan josparly tekserýler júrip jatyr. Iaǵni barlyq obektiler joǵary syn-qater dárejesine jatady, sondyqtan olar jii tekseriledi. Birinshi jartyjyldyqqa shamamen 8 myń nysan josparlanǵan, olardyń jartysynan kóbi tekserildi. Mamyr aiynyń sońy men maýsymnyń basynda barlyq tekserýlerdiń nátijesi halyqqa jetkiziledi dep aitýǵa bolady», - dedi TJM ókili.
Degenmen, basqarma basshysy órt qaýipsizdigi talaptaryn buzýshylyqtar bar ekenin jetkizdi.
«Biraq bul ádette standartty buzýshylyqtar - evakýatsiialyq shyǵý joldarynyń jabylýy, joldardyń bitelýi, aqaýly elektr jabdyqtary jáne basqalary. Anyqtalǵan buzýshylyqtar boiynsha bilim berý nysandarynyń basshylaryna nusqama beriledi, olardy joiý merzimderi bekitiledi, olardy oryndamaǵany úshin jaýapkershilik kórsetiledi. Oqý jylynyń bastalýyna deiin uiǵarym alǵan barlyq bilim berý nysandary baqylanatyn bolady»,- dedi E. Tóregeldiev.
