Foto: Tengrinews.kz
Pavlodarda Jastar úiiniń kámeletke tolmaǵan tárbielenýshisin zorlaý isi boiynsha sot protsesi aiaqtaldy, - dep habarlaidy Tengrinews.kz saity.
2022 jyly 16 jastaǵy qyz úsh jigittiń toptasyp qorlaýynan keiin 10 qabatty úidiń terezesinen sekirip ketken.
Aiyptalýshy tarapta úsh adam bolǵan, olardyń bireýi - 19 jasta. Pavlodar oblysynyń qylmystyq ister jónindegi mamandandyrylǵan aýdanaralyq soty ony QR QK-nyń 120-baby 3-1-bóligi "Kámeletke tolmaǵandy zorlaý", 121-baby 3-1-bóligi "Kámeletke tolmaǵanǵa qatysty jynystyq sipattaǵy zorlyq-zombylyq áreketteri" boiynsha kináli dep tanyp, 15 jyl 6 aiǵa bas bostandyǵynan aiyrý týraly úkim shyǵarǵan. Sondai-aq, ol jábirlenýshige moraldyq shyǵyn retinde segiz million teńge tóleýge mindetteldi.
Sot osy is boiynsha taǵy eki aiyptalýshyny QR Qylmystyq kodeksiniń 434-baby "Qylmys týraly habarlamaý" boiynsha tórt jylǵa bas bostandyǵynan aiyrǵan.
"Oqiǵadan keiin, qyz sekirip ketken soń, olar jedel járdem shaqyrmaǵan. Biraq oqiǵaǵa kýá bolǵan. Eshteńe bolmaǵandai tarap ketken", - deidi Pavlodar oblysynyń mamandandyrylǵan aýdanaralyq qylmystyq ister basqarmasynyń sýdiasy Baqyt Nurlanov.
Sottalǵandar jazasyn ortasha qaýipsizdiktegi túzeý mekemesinde óteitin bolady. Protsess jabyq esik jaǵdaiynda ótti. Sottalýshylardy advokattardan bólek ata-analary men jaqyn týystary qorǵady.
Bastapqyda qyzdy toptasyp zorlaǵany habarlanǵan. Biraq keiin ony úsh jigittiń biri zorlaǵany belgili boldy. Toptyq qorlaýdan qoryqqan ol kópqabatty úidiń terezesinen sekirip ketken.
Qyz aǵashtarǵa qulap, aman qalǵan. Bir jyldan asa Astana men Pavlodardaǵy aýrýhanalarda jatyp, birneshe ota jasalǵan.
