فوتو: Tengrinews.kz
پاۆلوداردا جاستار ٷيٸنٸڭ كەمەلەتكە تولماعان تەربيەلەنۋشٸسٸن زورلاۋ ٸسٸ بويىنشا سوت پروتسەسٸ اياقتالدى, - دەپ حابارلايدى Tengrinews.kz سايتى.
2022 جىلى 16 جاستاعى قىز ٷش جٸگٸتتٸڭ توپتاسىپ قورلاۋىنان كەيٸن 10 قاباتتى ٷيدٸڭ تەرەزەسٸنەن سەكٸرٸپ كەتكەن.
ايىپتالۋشى تاراپتا ٷش ادام بولعان, ولاردىڭ بٸرەۋٸ - 19 جاستا. پاۆلودار وبلىسىنىڭ قىلمىستىق ٸستەر جٶنٸندەگٸ مامانداندىرىلعان اۋدانارالىق سوتى ونى قر قك-نىڭ 120-بابى 3-1-بٶلٸگٸ "كەمەلەتكە تولماعاندى زورلاۋ", 121-بابى 3-1-بٶلٸگٸ "كەمەلەتكە تولماعانعا قاتىستى جىنىستىق سيپاتتاعى زورلىق-زومبىلىق ەرەكەتتەرٸ" بويىنشا كٸنەلٸ دەپ تانىپ, 15 جىل 6 ايعا باس بوستاندىعىنان ايىرۋ تۋرالى ٷكٸم شىعارعان. سونداي-اق, ول جەبٸرلەنۋشٸگە مورالدىق شىعىن رەتٸندە سەگٸز ميلليون تەڭگە تٶلەۋگە مٸندەتتەلدٸ.
سوت وسى ٸس بويىنشا تاعى ەكٸ ايىپتالۋشىنى قر قىلمىستىق كودەكسٸنٸڭ 434-بابى "قىلمىس تۋرالى حابارلاماۋ" بويىنشا تٶرت جىلعا باس بوستاندىعىنان ايىرعان.
"وقيعادان كەيٸن, قىز سەكٸرٸپ كەتكەن سوڭ, ولار جەدەل جەردەم شاقىرماعان. بٸراق وقيعاعا كۋە بولعان. ەشتەڭە بولماعانداي تاراپ كەتكەن", - دەيدٸ پاۆلودار وبلىسىنىڭ مامانداندىرىلعان اۋدانارالىق قىلمىستىق ٸستەر باسقارماسىنىڭ سۋدياسى باقىت نۇرلانوۆ.
سوتتالعاندار جازاسىن ورتاشا قاۋٸپسٸزدٸكتەگٸ تٷزەۋ مەكەمەسٸندە ٶتەيتٸن بولادى. پروتسەسس جابىق ەسٸك جاعدايىندا ٶتتٸ. سوتتالۋشىلاردى ادۆوكاتتاردان بٶلەك اتا-انالارى مەن جاقىن تۋىستارى قورعادى.
باستاپقىدا قىزدى توپتاسىپ زورلاعانى حابارلانعان. بٸراق كەيٸن ونى ٷش جٸگٸتتٸڭ بٸرٸ زورلاعانى بەلگٸلٸ بولدى. توپتىق قورلاۋدان قورىققان ول كٶپقاباتتى ٷيدٸڭ تەرەزەسٸنەن سەكٸرٸپ كەتكەن.
قىز اعاشتارعا قۇلاپ, امان قالعان. بٸر جىلدان اسا استانا مەن پاۆلودارداعى اۋرۋحانالاردا جاتىپ, بٸرنەشە وتا جاسالعان.
