Pavlodardyń Jastar bastamalaryn damytý ortalyǵynda qoǵamnyń belsendi býynymen keńes otyrysy ótti, dep habarlaidy pavlodarnews.kz.
Jiynǵa oblys ákimi Bolat Baqaýov, respýblikalyq jastar uiymdarynyń kóshbasshylary men óńir jastary qatysty.
- Respýblikada jyl saiynǵy jastarǵa arnalǵan «Daryn» úkimettik syilyǵy bekitilgen. Jastar jyly bizdiń oblysta osyndai syilyqty qarastyrýdy jáne oǵan «Ertis daryny» ataýyn berip, laýreattar úshin keminde 10 mln teńge júlde qoryn taǵaiyndaý týraly tujyrymdama ázirleýdi usynamyn, - dep atap ótti Bolat Baqaýov.
Atalmysh syiaqyny 1 jeltoqsan - QR Tuńǵysh Prezidenti kúni tapsyrý týraly sheshim qabyldandy.
Sonymen qatar, Pavlodarda «Bolashaq» qaýymdastyǵynyń filialyn ashý usynyldy. Búginde prokýratýra organdarynda jumys isteitin halyqaralyq stipendiia iegeri Erjan Dosymjanov óńirde osy baǵdarlama boiynsha oqyǵan 200-den astam adam bar ekenin atap ótti.
- «Bolashaq» baǵdarlamasy boiynsha bilim alǵandar úshin alań qurylsa, halyqaralyq stipendiiaǵa úmitkerler sol jerde oqýǵa túsý men oqýdyń qyr-syry týraly biletin edi, - dedi Erjan Dosymjanov. - Ókinishke orai, oblysta mundai alań joq. Statistika boiynsha, aimaqta 203 túlek bolsa, meniń WhatsApp tobymda tek 20-sy ǵana bar. Biz NIS mektebiniń platformasynda únemi kezdesip turamyz. Bul bilim ordasynyń direktory Rinat Jumabaev bolashaqtyq bolyp tabylady. Barlyq 203 adamdy jinaý múmkin emes, sondyqtan platforma qajet.
Oblys ákimi Bolat Baqaýov jastar bastamalaryn damytý ortalyǵy bazasynda qaýymdastyqtyń filialyn qurýdy jáne onda tek «Bolashaq» stipendiattaryn ǵana emes, sonymen qatar shetelde bilim alǵandardyń barlyǵyn biriktirýdi usyndy.
«Bolashaq» respýblikalyq qaýymdastyǵynyń atqarýshy direktory Laýra Demesinovanyń aitýynsha, elimizde 8 Korporativtik qor jumys isteidi. Ol pavlodarlyqtarǵa qoldaý kórsetýge ýáde berip, aimaqtarǵa baǵyttalǵan Network, Jastar kadrlyq rezervi, «Jastar Otanǵa» jastar festivaline qatysýǵa shaqyrdy.
Otyrystyń sońynda óńir basshysy jastar ortalyǵyna vokaldyq-aspaptyq ansamblge mýzykalyq aspaptar satyp alý úshin sertifikat tabys etti.
