Pavlodar oblysynda 14 jastaǵy qyz órtke oranǵan úidiń terezesi arqyly eki sińlisin alyp shyqty. Oqiǵa saldarynan bir adam mert boldy. Bul týraly QR Ishki ister ministrligi Tótenshe jaǵdailar komitetiniń resmi ókili Nursultan Nurahmetov aitty, dep habarlaidy QazAqparat.
«21 aqpan kúni saǵat 15.29-da órtke qarsy qyzmet Karl Marks kóshesindegi eki páterli jekemenshik turǵyn úi órtenip jatqany týraly habar aldy. Saǵat 15.37-de qutqarýshylar oqiǵa ornyna jetken kezde páterlerdiń birinde kiim-keshekter, jihazdar men aǵashtan turǵyzylǵan aralyq qabyrǵalar, sondai-aq úidiń aǵash konstrýktsiialary janyp jatqanyn anyqtady. Tilsiz jaýdyń taralýy 16.35-te toqtatylyp, tolyǵymen 19.51-de aýyzdyqtaldy. Jalyn sharpyǵan aýmaq 120 sharshy metrdi qurady. Órt sóndirýshiler 4 gaz ballonyn alyp shyqty. Oqiǵa ornynda 1948 jyly týǵan er adamnyń jartylai kúiik shalǵan denesi tabyldy», - dedi N.Nurahmetov.
Sondai-aq resmi ókildiń aitýynsha, órt sóndirýshiler jetkenshe úide bolǵan 14 jastaǵy qyz jalyndaǵan úidiń terezesinen 2015 jyly týǵan eki sińlisin alyp shyqqan.
«Órttiń shyǵý sebebi men shyǵyn kólemi anyqtalýda. Jalynmen kúreske Pavlodar oblystyq TJD-nyń 22 adamy men 9 tehnikasy jumyldyryldy», - dedi ol.
