پاۆلودار وبلىسىندا 14 جاستاعى قىز ٶرتكە ورانعان ٷيدٸڭ تەرەزەسٸ ارقىلى ەكٸ سٸڭلٸسٸن الىپ شىقتى. وقيعا سالدارىنان بٸر ادام مەرت بولدى. بۇل تۋرالى قر ٸشكٸ ٸستەر مينيسترلٸگٸ تٶتەنشە جاعدايلار كوميتەتٸنٸڭ رەسمي ٶكٸلٸ نۇرسۇلتان نۇراحمەتوۆ ايتتى, دەپ حابارلايدى قازاقپارات.
«21 اقپان كٷنٸ ساعات 15.29-دا ٶرتكە قارسى قىزمەت كارل ماركس كٶشەسٸندەگٸ ەكٸ پەتەرلٸ جەكەمەنشٸك تۇرعىن ٷي ٶرتەنٸپ جاتقانى تۋرالى حابار الدى. ساعات 15.37-دە قۇتقارۋشىلار وقيعا ورنىنا جەتكەن كەزدە پەتەرلەردٸڭ بٸرٸندە كيٸم-كەشەكتەر, جيھازدار مەن اعاشتان تۇرعىزىلعان ارالىق قابىرعالار, سونداي-اق ٷيدٸڭ اعاش كونسترۋكتسييالارى جانىپ جاتقانىن انىقتادى. تٸلسٸز جاۋدىڭ تارالۋى 16.35-تە توقتاتىلىپ, تولىعىمەن 19.51-دە اۋىزدىقتالدى. جالىن شارپىعان اۋماق 120 شارشى مەتردٸ قۇرادى. ٶرت سٶندٸرۋشٸلەر 4 گاز باللونىن الىپ شىقتى. وقيعا ورنىندا 1948 جىلى تۋعان ەر ادامنىڭ جارتىلاي كٷيٸك شالعان دەنەسٸ تابىلدى», - دەدٸ ن.نۇراحمەتوۆ.
سونداي-اق رەسمي ٶكٸلدٸڭ ايتۋىنشا, ٶرت سٶندٸرۋشٸلەر جەتكەنشە ٷيدە بولعان 14 جاستاعى قىز جالىنداعان ٷيدٸڭ تەرەزەسٸنەن 2015 جىلى تۋعان ەكٸ سٸڭلٸسٸن الىپ شىققان.
«ٶرتتٸڭ شىعۋ سەبەبٸ مەن شىعىن كٶلەمٸ انىقتالۋدا. جالىنمەن كٷرەسكە پاۆلودار وبلىستىق تجد-نىڭ 22 ادامى مەن 9 تەحنيكاسى جۇمىلدىرىلدى», - دەدٸ ول.
