© Photo : Akimat Pavlodarskoi oblasti/Valerii Býgaev
Pavlodarda jańadan salynyp jatqan mektep jartylai qulady. Oqiǵa 7 qarasha kúni bolǵan edi. Arada bir kún ótken soń qirandylardyń astynda qalyp qoiǵan er adamnyń denesi tabyldy, dep habarlaidy Pavlodar oblystyq tótenshe jaǵdailar departamenti.
Kazahstanskaia pravda kóshesinde salynyp jatqan ǵimarattyń eden plitasy qulady. Osylaisha qirandylardyń astynda 1967 jyly týǵan er adam qalyp qoidy.
“Oqiǵa ornynda jiyrma qutqarýshy jáne alty tehnika jumys istedi. Sondai-aq tótenshe jaǵdailarǵa jaýap berý ortalyǵy quryldy. Er adamdy izdeý úshin jylý beineleý kamerasymen jabdyqtalǵan dron da paidalanyldy. Nátijesinde tańǵy saǵat 4:31-de qirandylar astynan er adamnyń denesi tabylyp, shyǵaryldy", – delingen habarlamada.
58 jastaǵy er adam 2025 jyldyń 7 qarashasynda qurylysy júrip jatqan mekteptiń qirandylarynyń astynda qalyp qoiǵan. Politsiia "Qurylys jumystary kezinde qaýipsizdik erejelerin buzý" baby boiynsha qylmystyq is qozǵady.
