Pavlodarda er adam áieline shabýyl jasap, pyshaqtap tastady. Áiel bes jerinen pyshaq jaraqatyn alǵan, onyń ekeýi basy men betinde. Qazir ol aýrýhanada jatyr. Politsiia oqiǵanyń mán-jaiyn anyqtap jatyr, - dep habarlaidy Tengrinews.kz agenttigi.
Jábirlenýshi úsh kishkentai balanyń anasy, olardyń eń kishisi alty ailyq. Pavlodarlyq áieldiń aitýynsha, jumystan qaityp kele jatqanda kúieýi oǵan shabýyl jasaǵan.
"17 qarashada kúndiz kúieýim jasyryn nómirden qońyraý shalyp, meni óltiremin dep qorqytty. Keshke jumystan shyǵyp, úige barý úshin ákemniń kelýin kútip, kóshede kele jatqanmyn. Kúieýim ańdyp, artymnan ergen. Ápkemmen telefon arqyly sóilesip kele jatqan edim, kenet basyma soqqy tigenin sezdim. Burylyp, qarsylasa bastadym, ol betimdi kesip jiberdi, sosyn iyǵyma jáne sol qolyma pyshaq suǵa bastady. Telefonǵa meni óltirgeli jatyr dep aiqailadym, ol pyshaqty qaltasyna salyp, ketip qaldy. Kóp qan joǵaltyp, ólip qala jazdadym", – deidi 30 jastaǵy Aidana Ábdirahmanova.
Ol ózi politsiiaǵa habarlasyp, jedel járdem shaqyrýdy ótingen. Bir apta buryn er adam úige mas bolyp kelip, janjal shyǵaryp, zattaryn jinap, ketip qalǵan.
"Kúieýim qorǵaý nusqamasyn buzdy, sot oǵan aiyppul saldy. 7 qarashada men ajyrasýǵa aryz berdim. Osy ýaqyt boiy maǵan tynym bermedi. Politsiiaǵa bardym, tórt aryz jazdym, ýchaskelik politsiia olardy qabyldady, biraq eshqandai qorǵaý bolǵan joq. 10 qarashada jumystan kele jatqanymda kúieýim maǵan shabýyl jasap, birneshe ret betimnen urdy", - deidi áiel.
Pavlodarlyq sot-meditsinalyq saraptamadan ótken. Biraq bul oqiǵa boiynsha áli sot bolǵan joq. Sońǵy shabýylǵa kelsek, politsiia málimetinshe, fakt tekserilip jatyr.
"Material Pavlodar qalalyq PB Ortalyq politsiia bólimine tirkeldi. Tekserý júrip jatyr", - dedi oblystyq Politsiia departamentiniń baspasóz qyzmeti ókilderi.
Sondai-aq, departament saraptama taǵaiyndaǵanyn, onyń qorytyndysy boiynsha protsessýaldyq sheshim qabyldanatynyn aitty. Politsiiadan bólek pavlodarlyq kelinshek "NeMolchikz" qorynan da kómek suraǵan. Áiel ózin kúieýinen qorǵap, obektiv tergeý júrgizýdi suraidy.
