Kelesi jyly Pavlodar qalasynda hakim Abaidyń 175 jyldyǵyna orai qazaqtyń bas aqynynyń, sondai-aq kórnekti ánshi, aqyn-sazger Estai Berkimbaiulynyń eskertkishteri ornatylady.
Byltyr elimiz áigili Estai Berkimbaiulynyń 150 jyldyǵyn keń kólemde atap ótti. Bul úrdis biyl da jalǵasyn tabýda. Sońǵy 9 jyldan beri kóterilip kele jatqan, kórnekti ánshi, aqyn-sazger, QazSSR-ǵa eńbek sińirgen óner qairatkeri Estai aqynǵa arnalǵan eskertkish máselesi oń sheshimin tapty.
- Estai Berkimbaiulyna arnalǵan eskertkish kópten beri ashyq taqyryp kúiinde qalyp kelgen edi. Oblys basshysy Bolat Jumabekulynyń qoldaýymen, óńirdiń ziialy qaýymdarynyń muryndyq bolýy - men bul másele qaita kóterilip, oń sheshimin taýyp otyr. Sátin salsa, 2020 jyly Pavlodar qalasynyń kórikti jeriniń birinen Estai atamyzǵa arnalǵan eskertkish boi kóteretin bolady, - dedi Pavlodar qalasy mádeniet jáne tilderdi damytý bóliminiń basshysy Samal Begalinova.
E.Berkimbaiulynyń eskertkishiniń nobaiyna arnalǵan baiqaýǵa Nur-Sultan, Almaty jáne Qaraǵandy qalalarynan 6 avtordan 9 jumys kelip túsken.
- Búgingi tańda oblystyq komissiianyń qaraýynda bolyp, usynylǵan 9 jumystyń 3-ýi iriktelip, respýblikaǵa jiberildi. Tańdalǵan úsh jumystyń bireýi elordalyq Azat Baiarlinge tiesili bolsa, eki jumys almatylyq Daniiar Sarbasovtiki. Aita keterligi, Daniiar - Baianaýyl óńiriniń týmasy, ózimizdiń jerlesimiz. Endigi sheshim - respýblikalyq komissiianyń quzyrynda, - dedi Pavlodar qalasy mádeniet jáne tilderdi damytý bóliminiń sektor meńgerýshisi Meiram Nuǵyman.
Estai Berkimbaiulyna arnalǵan eskertkishti qalalyq saiabaqtyń Estai – Akademik Bekturov kósheleriniń qiylysatyn tusynda ornatý usynylǵan eken.
Alaida, óńir basshysy Estaidyń eskertkishin qalanyń kórikti ári kózge birden túsetin jerine qoiýdy usynǵan. Aldaǵy ýaqytta eskertkish boi kóteretin orynnyń aýysýy bek múmkin. Al ony ornatýǵa biýdjetten 50 mln teńge bólingen.
Mamyr aiynda ara sózdiń zergeri bolǵan hakim Abai Qunanbaevtyń 175 jyldyǵyn joǵary deńgeide merekeleý týraly jarlyqqa el Prezidenti Qasym-Jomart Toqaev qol qoiyp, Úkimetke birqatar tapsyrma bergeni esimizde. Ol qatarda Abaidyń eskertkishi joq óńirlerge aqynnyń músinin ornatý da bar edi.
- Aldaǵy ýaqytta Abai atamyzdyń 175 jyldyǵyn merekeleý boiynsha atqarylatyn ister az emes. Olardyń ishinde eskertkish qoiý máselesi basty nazarda. Jýyrda jariialanǵan baiqaýǵa Nur-Sultan, Almaty, Aqtóbe qalalarynan jáne Resei astanasy Máskeýden 9 avtordan 11 jumys kelip tústi. Aimaqtyq komissiia músheleri olardyń ishinen 3 jumysty tańdap alyp, respýblikalyq komissiianyń qaraýyna jiberdi. Mundaǵy tańdap alynǵan avtorlardyń barlyǵy - bas qalanyń músinshileri. Olar - Asqar Nartov, Toqtar Ermekov jáne Baqytbek Muhamedjanov, - deidi M.Nuǵyman. Sonymen, Abai Qunanbaiulyna arnalǵan eskertkish oblys ortalyǵyndaǵy Abai – Krivenko kósheleriniń qiylysynda ornatylady dep kútilýde. Eskertkish ornatýǵa 70 mln teńge bólingen.
Budan bólek, pavlodarlyqtar Nur-Sultan qalasyna akademik Qanysh Sátbaevtyń eskertkishin syiǵa tartpaq. Qanysh eskertkishi boiynsha da oblystyq komissiianyń otyrysy ótti. Oǵan 7 avtordan 7 nobai usynylǵan. Olardyń ishinen nursultandyq Asqar Nartov pen almatylyq Aidos Búrkitovtiń jumystary tańdalyp alynǵan. Ol da respýblikalyq komiiasynyń qaraýyna jiberilmek.
Atalǵan jumystar boiynsha Pavlodar qalalyq ákimdigi Facebook paraqshasynda bylai dep habarlama qaldyrǵan:
- Jumys avtorlaryna Qanysh Sátbaevtyń Otanyna sheksiz súiispenshilik, Abai Qunanbaevtyń filosofiialyq oiynyń tereńdigi jáne Estai Berkimbaevtyń janynyń lirikasyn kórsetý mindettelgen. Kezdesý qorytyndysy boiynsha bolashaq monýmentter jobalarynyń úzdik nusqalary irikteldi, - delingen jazbada.
Mamandardyń aitýynsha, respýbli-kalyq komissiiasynyń qorytyndysy aldaǵy aptada shyǵýy tiis.
«Baiqaý týraly ǵalamtordan oqyp bildim. Týǵan jerimde qolǵa alynyp jatqan aýqymdy iske óz úlesimdi qosýdy maqsat etip, birden 3 alyptyń eskertkishiniń nobaiyn jasaýǵa kiristim. Qanysh Sátbaevtyń eskertkishine 1, Abai Qunanbaevqa 2, Estai Berkimbaevqa 3 jumysymdy jibergen edim. Qazir Estai atamyzǵa arnap salǵan 3 nobaidyń ekeýi oblystyq kezeńnen ótken eken. Eger respýblikalyq komissiia meniń eńbegimdi baǵalap, týǵan qalamnyń tórinen meniń jumysymdy, iaǵni Estai atamyzdyń eskertkishin ornatyp jatsa, budan asqan baqyt joq!», - deidi músinshi Daniiar Sarbasov.
Qarlyǵash HAShYMQYZY,
