Denesiniń 50 paiyzyn kúiik shalǵan áieldiń jaǵdaiy birneshe kún buryn kúrt nasharlap ketken, dep habarlaidy "Ult aqparat" Pavlodarnews.kz -ke silteme jasap.
Pavlodar oblystyq densaýlyq saqtaý basqarmasynyń málimetinshe, Rozovka aýylynyń turǵyny aýrýhanada kóz jumǵan. Buǵan deiin onyń jaǵdaiynyń aýyr ekenin dárigerler aitqan bolatyn.
- Naýqastyń jaǵdaiy sońǵy kúnderi nasharlap ketti. Osyǵan bailanysty ol jasandy tynys alý apparatyna qosylǵan bolatyn. Ókinishke qarai, áiel búgin qaitys boldy, - dedi oblystyq densaýlyq saqtaý basqarmasynyń baspasóz qyzmeti.
34 jastaǵy áieldi ishimdikke toiyp alǵan kúieýi órtegen. Oblystyq politsiia departamentiniń málimetinshe, erli-zaiyptylar oqys oqiǵaǵa deiin ózara urysqan. Keiin áieli mas kúiinde kólik tizgindemek bolǵan kúieýine ruqsat bermegen. Ol tońazytqyshta turǵan spirtti alyp, áieline shashyp, ottyqpen ot qoiǵan.
Órtengenine qaramastan áiel kúieýiniń ústinen aryz jazýdan bas tartqan. Alaida quqyq qorǵaý organdary densaýlyqqa qasaqana aýyrlyǵy ortasha ziian keltirgeni úshin sotqa deiingi tergeýdi bastady.
Bolǵan jaǵdaiǵa qaramastan,otbasynyń kórshileri erli-zaiyptylardyń tatý bolǵanyn aitady. Olardyń ortaq úsh balalary bar. Qazir olar atasy men ájesiniń qolynda.
