Pavlodarda kóktemniń alǵashqy kúni qala turǵyndaryna qiyndyq týdyrdy. Qarly boran, jel, odan keiin jaýǵan jańbyrdan joldar kóktaiǵaqqa ainalǵan. Ol qoǵamdyq kólikter qozǵalysyn qiyndatty, - dep habarlaidy Tengrinews.kz saity.
Qalalyq turǵyn úi-kommýnaldyq sharýashylyq bólimi málimetinshe, qazir Pavlodarda kósheler men jaiaý júrginshiler jolyna kóktaiǵaqqa qarsy materialdar sebilgen. Jumysqa 20-dan asa arnaiy tehnika men 200-ge jýyq jumysshy jumyldyrylǵan. Aýyldyq joldardaǵy jaǵdai budan da jaman ekeni aitylady. Qaladan shyǵar jolda birneshe avtobýs jol jiegine shyǵyp ketken.
Avtobýstar jol apatynan aman qalǵan. Pavlodarlyqtar Instagram jelisinde aýa raiynyń qolaisyzdyǵyna qatysty foto jáne videolar júktep jatyr.
"Jol áinek siiaqty, biryńǵai muz, júrgizýshiniń kásibi biliktiligi arqasynda avtobýs aýdarylyp qalmady", - dep jazdy Pavlodardan qala mańyna qarai bet alǵan avtobýs jolaýshylarynyń biri.
Áieldiń aitýynsha, avtobýs salonynda adam kóp bolǵan.
1 naýryzǵa qaraǵan túni respýblikalyq jáne oblystyq mańyzy bar joldardyń birneshe ýchaskesinde kólik qozǵalysy jabyldy. Oblystyq Tótenshe jaǵdailar departamenti baspasóz qyzmeti málimetinshe, Ekibastuz baǵytyndaǵy ýaqytsha baqylaý beketine 12 avtobýs, 120 júk jáne jeńil kólikter jinalyp qalǵan, olardyń ishinde 820-ǵa jýyq adam bar, onyń 70-i bala.
