Pavlodar oblysynyń turǵyndary Dýbaidan Nur-Sultanǵa QHR azamattarymen bir ushaqta ushyp kelgen, dep habarlaidy "Ult aqparat".
«Qazirgi ýaqytta Pavlodar aimaǵynyń bes turǵynyn oqshaýlaý boiynsha epidemiolog mamandar meditsinalyq qyzmet kórsetýde. Bes adamnyń úsheýi-Aqsý, ekeýi Pavlodar qalasynyń turǵyndary, - dedi Pavlodar oblysy boiynsha Taýarlar men kórsetiletin qyzmetterdiń sapasyn baqylaý departamentiniń basshysy Sádýaqas Baiǵabulov óńirlik kommýnikatsiia qyzmetinde ótken brifingide.
«Olardyń eń úlkeni 54 jasta, eń kishisi – 21 jasta. Arasynda balalar joq».
S.Baiǵabulovtyń aitýynsha, qazir jedel meditsinalyq kómek qyzmetkerleri olardy statsionarlyq baqylaýǵa alǵan.
«Atalǵan Pavlodar óńiriniń turǵyndarynyń jaǵdaiy turaqty. Dene qyzýy, sýyq tiiý belgileri baiqalmaǵan, biraq bul azamattar koronavirýstyq infektsiianyń taralý deńgeii qolaisyz elderden kelgendikten Qazaqstan Respýblikasynyń Bas sanitar dárigeriniń qaýlysyna sáikes, olar 14 kúnge karantinge jiberiledi, - dep atap ótti Sádýaqas Baiǵabulov.
«Tiisinshe, zerthanalyq zertteýler jasalady, taldamalar alynady, birqatar test jasalady. Eger olar teris nátije kórsetse jáne densaýlyq jaǵdaiy turaqty bolsa, onda olar turǵylyqty jeri boiynsha on kún boiy baqylaýda bolady».
