Foto: polisia.kz
Shilde aiynyń ortasynda jedel qyzmetkerlerge kórshi memlekettiń azamatynyń búiregin satý týraly jedel aqparat túsken. Osy maqsatta sheteldik áiel Pavlodar qalasyna kelip, baǵa men sharttardy talqylap, satýǵa kelisim bergen.
— UQQKB qyzmetkerleri kúdiktini kelisilgen aqshanyń bir bóligin alý kezinde ustady. Atalǵan fakt boiynsha qylmystyq is qozǵaldy. Kúdikti qamaýǵa alyndy. Qajetti tergeý áreketteri júrgizilip jatyr, — dedi Pavlodar oblysy PD bastyǵynyń birinshi orynbasary Bolat Nurseiitov.
Spiker qoldanystaǵy zańnamaǵa sáikes Qazaqstanda zańsyz transplantatsiialaýǵa, sondai-aq adam aǵzalarynyń, músheleriniń, tinderiniń jáne tinderiniń bólikterin satý, satyp alýǵa tyiym salynǵanyn jáne ol úshin qylmystyq jaýapkershilikke tartylatynyn eske saldy.
— Politsiia azamattardy osyndai faktilerge kýá bolǵan jaǵdaida, «102» arnasyna nemese «police 102» mobildi qosymsha arqyly habarlaýǵa shaqyrady. Anonimdilikke kepildik beriledi, — delingen habarlamada.
Aita ketelik elimizde jyl basynan beri adam saýdasyna qatysty 285 qylmystyq is tirkelgen. Onyń 28-i kámelet jasyna tolmaǵan balalarǵa bailanysty.
