© Photo: Azamattarǵa arnalǵan úkimet
Pavlodar oblysynda uiymdasqan qylmystyq top músheleri josyqsyz kásipkerlerge materialdyq syiaqy úshin 6,8 mlrd teńge salyq tóleýden jaltarýǵa kómektesken, dep habarlaidy "Ult aqparat" Qarjylyq monitoring agenttiginiń baspasóz qyzmetine silteme jasap.
"Uiymdasqan qylmystyq toptyń jetekshisi men onyń 9 múshesi 26 enshiles kompaniiany tirkep, olardyń atynan 4 jyl ishinde 18 mlrd teńgeden astam somaǵa jalǵan shot-faktýralar jazyp bergeni dáleldendi.
Bul qylmystyq toptyń qyzmetin 225 kásiporyn paidalanǵan, onyń ishinde energiia tasymaldaýshy kompaniia óz shyǵyndaryn asyra kórsetip, elektr energiiasynyń tarifin zańsyz kótergen.
Uiymdasqan qylmystyq topty joiý nátijesinde baqylaýdaǵy kompaniialardy tirkeý zańsyz dep tanyldy, satyp alýshylarǵa 560 mln teńgeden astam somaǵa salyq tóleý týraly habarlamalar berildi, elektr energiiasyn tutynýshylar úshin 580 mln teńgeden astam soma tarif qaitaryldy" - delingen habarlamada.
Agenttik málimetinshe, sot úkimimen uiymdasqan qylmystyq toptyń jetekshisi 8 jylǵa bas bostandyǵynan aiyrý jazasyn ortasha qaýipsizdiktegi qylmystyq-atqarý júiesi mekemesinde, qalǵan músheleri 3 jyldan 8 jylǵa deiin bas bostandyǵynan aiyrý jazasyna kesilgen.
Aita ketý kerek, salyq tóleýshiler úshin salyq tóleý mindetti bolyp tabylady, al zańnamada salyq tóleýden jaltarǵany úshin jaýapkershilik qarastyrylǵan.
