Biyl qazaqtyń uly aqyny, aǵartýshy, filosof Abai Qunanbaiulynyń 175 jyldyǵyna orai elimiz qalalarynda eskertkishter ornatylyp jatyr. Pavlodardaǵy eskertkish qalanyń ortalyq alańynan oryn tepti, dep habarlaidy "Ult aqparat".
Abai músini kórkem qoladan, tuǵyry granitten jasalǵan, biiktigi – 5,25 metr. Tuǵyrǵa Abaidyń «Adamzattyń bárin súi, baýyrym dep...» degen tsitatasy jazyldy. Eskertkishtiń avtory – Qazaqstan Sýretshiler odaǵynyń múshesi, músinshi Asqar Nartov.
Onyń eskizdik jobasyn QR Mádeniet jáne sport ministrligi janyndaǵy Qazaqstandaǵy monýmentaldy ónerdiń jańa qurylystaryn ornatý boiynsha komissiia músheleri tańdady.
«Bul Hákim Abaidyń ornatylǵan ádettegi eskertkishterdiń biri ǵana emes, uly qundylyqtar men rýhaniiatty eske salyp turatyn qasietti músin! Tán emes, jannyń azyǵyn izdep, adam bolmysyn túsinýge tyrysqan Abai jazbalarynyń jańǵyrǵy, mine, osy kúnge jetti. Onyń ár sózi osy jerde turǵan adamdardyń janyna qýat, rýhyna jiger, sanasyna aqyl beretinine senimdimin», - dedi Pavlodar oblysynyń ákimi Ábilqaiyr Sqaqov ashylý saltanatynda.
Abai eskertkishin óńir basshysymen birge abaitanýshy, qazaq filosofiiasy tarihyn zertteýshi Ǵarifolla Esim, opera ánshisi, Qazaqstannyń eńbek sińirgen ártisi Shahimardan Ábilov jáne oblystyq ardagerler keńesiniń tóraǵasy Rymtai Shókeev ashty. Saltanatty rásimge Pavlodar qalasynyń kórnekti óner, mádeniet, ádebiet jáne jýrnalistika qairatkerleri qatysty. Qonaqtar jańa eskertkishke gúl shoqtaryn qoiyp, onyń qalanyń basty ári kórikti jerleriniń biri bolatynyna senim bildirdi.
Eskertkish ashylǵannan keiin Ábilqaiyr Sqaqov sharanyń qurmetti meimandarymen birge oblystyq kitaphanada shyǵarmashyl jastarmen kezdesti. Bul ádebiette, mýzykada, jýrnalistikada, kórkem jáne teatr ónerinde ózderin damytyp júrgen jastar.
«Abai - jastardyń mańyzdy dosy, óitkeni ol máńgi jas. Men 40-50 jastaǵy adamdardy «qola» dep ataimyn. 30-40 jastaǵylar – «kúmis». Al 15-25 jastaǵy jastar – «altyn» urpaq. 10 jyldan keiin eldi basqaryp, keiingi urpaqtyń bolashaǵyn quratyn sizder!», - dedi jas urpaq ókilderine Ǵarifolla Esim.
Kezdesýge qatysqandardyń arasynda Shaqat aýyldyq mektebiniń oqýshysy Galina Evloeva da boldy. Onynshy synyp oqýshysy qazaq tilin úirenýdi Abai shyǵarmalarynan bastaý kerek ekenin aityp, aqynnyń «Júregim, neni sezesiń?» atty óleńin oqyp berdi. Qazaqstannyń eńbek sińirgen ártisi Shahimardan Ábilov Abaidyń taǵy bir tanymal shyǵarmasy «Kózimniń qarasy» ánin oryndady. Tanymal ándi búkil zal qosyla shyrqady.
Odan soń qonaqtar daryndy balalarǵa arnalǵan №10 gimnaziiada boldy. Biyl mektepke Abai esimi berilgeli 80 jyl toldy. Osy jyly oqý ornynda jańa korpýs salynyp, kúrdeli jóndeý jumystary júrgizildi, «Zamanaýi mektep» baǵdarlamasy boiynsha bezendirilip, jabdyqtaldy.
