Pavlodar oblysynyń Aqsý qalasyndaǵy Qarttar men múgedekterge arnalǵan áleýmettik ortalyqta 28 adam koronavirýs juqtyrdy, dep habarlaidy "Ult aqparat" Pavlodarnews.kz saityna silteme jasap.
Aimaqtyń Sanitariialyq-epidemiologiialyq baqylaý departamenti ókilderiniń aitýynsha, alǵashqy jaǵdai 28 qarasha kúni tirkelgen. Tekseristen ótý úshin emhanaǵa ortalyqtyń sanitar qyzmetkeri júginip, odan koronavirýs anyqtalǵan. Sol kúni áielmen jaqyn bailanysta bolǵan eki qyzmetker men qamqorlyqqa alynǵan 34 adam PTR-test tapsyrdy.
29 qarashada mekemeniń úlestirýshisi emhananyń mobildi tobyna júgingen. PTR-tekseristen 70 adam ótti, onyń 69-y qamqorlyqqa alynǵan tulǵa.
«2020 jylǵy 4 jeltoqsandaǵy jaǵdai boiynsha Aqsýdaǵy Qarttar men múgedekterge arnaiy áleýmettik qyzmet kórsetý ortalyǵynda COVID-19 juqtyrýdyń 28 oqiǵasy tirkeldi. 22-si qamqorlyqqa alynǵan tulǵa, 19-ynda aýrý simptomsyz ótýde. Sondai-aq koronavirýs alty qyzmetkerden anyqtaldy, olardyń ekeýinde indet belgileri bar. Syrqattanǵan azamattardyń barlyǵy aýrýhanaǵa jatqyzyldy. Taǵy tórt qyzmetker – úi karantininde», - dedi mekeme ókilderi.
Jalpy mekemede 195 turǵyn men 38 qyzmetker bar. Barlyǵy COVID-19-ǵa test tapsyrǵan.
Eske sala ketsek, epidemiialyq jaǵdaidyń nasharlaýyna bailanysty Pavlodar, Ekibastuz jáne Aqsý qalalarynda mektepterdegi kezekshi synyptar jabylyp jatyr.
Pavlodar oblysy koronavirýs indeti boiynsha «qyzyl aimaqta» tur. Qazirgi ýaqytta 6780 virýs juqtyrý oqiǵasy tirkelgen. Olardyń 526-y Aqsý qalasynda.
