پاۆلودار وبلىسىنىڭ اقسۋ قالاسىنداعى قارتتار مەن مٷگەدەكتەرگە ارنالعان ەلەۋمەتتٸك ورتالىقتا 28 ادام كوروناۆيرۋس جۇقتىردى, دەپ حابارلايدى "ۇلت اقپارات" Pavlodarnews.kz سايتىنا سٸلتەمە جاساپ.
ايماقتىڭ سانيتارييالىق-ەپيدەميولوگييالىق باقىلاۋ دەپارتامەنتٸ ٶكٸلدەرٸنٸڭ ايتۋىنشا, العاشقى جاعداي 28 قاراشا كٷنٸ تٸركەلگەن. تەكسەرٸستەن ٶتۋ ٷشٸن ەمحاناعا ورتالىقتىڭ سانيتار قىزمەتكەرٸ جٷگٸنٸپ, ودان كوروناۆيرۋس انىقتالعان. سول كٷنٸ ەيەلمەن جاقىن بايلانىستا بولعان ەكٸ قىزمەتكەر مەن قامقورلىققا الىنعان 34 ادام پتر-تەست تاپسىردى.
29 قاراشادا مەكەمەنٸڭ ٷلەستٸرۋشٸسٸ ەمحانانىڭ موبيلدٸ توبىنا جٷگٸنگەن. پتر-تەكسەرٸستەن 70 ادام ٶتتٸ, ونىڭ 69-ى قامقورلىققا الىنعان تۇلعا.
«2020 جىلعى 4 جەلتوقسانداعى جاعداي بويىنشا اقسۋداعى قارتتار مەن مٷگەدەكتەرگە ارنايى ەلەۋمەتتٸك قىزمەت كٶرسەتۋ ورتالىعىندا COVID-19 جۇقتىرۋدىڭ 28 وقيعاسى تٸركەلدٸ. 22-سٸ قامقورلىققا الىنعان تۇلعا, 19-ىندا اۋرۋ سيمپتومسىز ٶتۋدە. سونداي-اق كوروناۆيرۋس التى قىزمەتكەردەن انىقتالدى, ولاردىڭ ەكەۋٸندە ٸندەت بەلگٸلەرٸ بار. سىرقاتتانعان ازاماتتاردىڭ بارلىعى اۋرۋحاناعا جاتقىزىلدى. تاعى تٶرت قىزمەتكەر – ٷي كارانتينٸندە», - دەدٸ مەكەمە ٶكٸلدەرٸ.
جالپى مەكەمەدە 195 تۇرعىن مەن 38 قىزمەتكەر بار. بارلىعى COVID-19-عا تەست تاپسىرعان.
ەسكە سالا كەتسەك, ەپيدەمييالىق جاعدايدىڭ ناشارلاۋىنا بايلانىستى پاۆلودار, ەكٸباستۇز جەنە اقسۋ قالالارىندا مەكتەپتەردەگٸ كەزەكشٸ سىنىپتار جابىلىپ جاتىر.
پاۆلودار وبلىسى كوروناۆيرۋس ٸندەتٸ بويىنشا «قىزىل ايماقتا» تۇر. قازٸرگٸ ۋاقىتتا 6780 ۆيرۋس جۇقتىرۋ وقيعاسى تٸركەلگەن. ولاردىڭ 526-ى اقسۋ قالاسىندا.
