Pavlodar oblysynda jas jigit burynǵy qyzynyń anasy men ógei ákesin pyshaqtap óltirdi, dep habarlaidy QazAqparat agenttigi Pavlodarnews.kz saityna silteme jasap.
Qaiǵyly jaǵdai Pavlodar oblysy Tereńkól aýdanynyń Beregovoe aýylynda boldy. 22 jastaǵy jigit ózin tastap ketken qyzdyń anasy men ógei ákesine pyshaqpen shabýyl jasaǵan. Ekeýi birneshe pyshaq jaraqatynan oqiǵa ornynda qaitys boldy.
16 jasar Alina sol túni Pavlodardaǵy týystarynyń úiinde qonǵandyqtan aman qalǵan.
Oblystyq politsiia departamenti baspasóz qyzmetiniń málimetinshe, 3 shilde kúni saǵat 02:10-da Mir kóshesindegi jeke úidiń aýlasynan 46 jastaǵy áiel men 48 jastaǵy er adamnyń pyshaqtalǵan denesi tabyldy.
«Marqumnyń kámeletke tolmaǵan balasy aman qaldy, ol bólmelerdiń birine tyǵylyp qalǵan. Atalǵan qylmys boiynsha kúdikti retinde 22 jastaǵy aýyl turǵyny anyqtalyp, ustaldy. Oqiǵa ornynda tiisti tergeý amaldary júrgizilýde», - dedi departamentten.
«Shamamen bir ai buryn men onyń esirtki qoldanatynyn bildim, sondyqtan onymen qarym-qatynasty toqtatýdy sheshtim. Ol qarsy boldy jáne meniń áli bul sheshimim úshin qatty ókinetinimdi aitty, - dep eske alady Alina. - 2 shildede men Pavlodarda boldym, kolledjge túsý úshin qujattar tapsyrýǵa daiyndaldym. Túnde tátem maǵan qońyraý shalyp, shuǵyl túrde oralýym kerek ekenin aitty. Úide anam men ógei ákemdi óltirip ketkenin bildim».
Qyzdyń sózinshe, týystary oǵan oqiǵanyń mán-jaiyn aityp bergen.
«Sol túni anam, ógei ákem jáne meniń 13 jasar baýyrym úide boldy. Olar túngi saǵat birge qarai otshashýdy estip, kóshege shyqqan. Baýyrym barǵysy kelmedi jáne úide qaldy. Biraz ýaqyttan keiin anam úige júgirip kelip, oǵan jasyryn dep aitqan. Baýyrymdy qutqarýǵa tyrysyp, kómek surap júgirgen. Ol alleiaǵa jetken kezde burynǵy jigitim ony qýyp jetken. Anam pyshaq jaraqatynan qaitys boldy. Buǵan deiin ol anamdy qorǵaýǵa tyrysqan ógei ákemdi de óltirgen», - dedi Alina.
Atalǵan fakti boiynsha QR QK-niń 99-baby 2-bóligine sáikes (Eki jáne odan da kóp adamdy óltirý) boiynsha sotqa deiingi tergeý júrgizilýde. Qylmystyń mán-jaiy tergeý barysynda anyqtalady.
Qylmysty tergeýmen Pavlodar oblysy politsiia departamentiniń tergeý basqarmasy ainalysady. Is boiynsha protsessýaldy prokýror taǵaiyndaldy.
