Olympic.kz
Erkin kúresten Olimpiada oiyndarynyń qola júldegeri Dáýlet Shabanbai sotqa tartyldy, - dep habarlaidy Ult.kz Tengrinews.kz-ke silteme jasap.
Is materialdary "Sot kabinetinde" jariialanǵan, onda oǵan bilik ókilderine kúsh qoldandy degen aiyp taǵylǵan. Basqa derekter ázirge jariialanǵan joq, tanymal balýan Pavlodardaǵy tergeý izoliatorynan aldaǵy sot otyrysyna jetkizilmek.
"Sot óndirisinde Shabanbai D.E.-ǵa qatysty QR QK 380-babynyń 4-bóligi 1-tarmaǵynda kózdelgen "Eki jáne odan da kóp adamǵa qatysty jasalǵan bilik ókiline kúsh qoldaný" qylmysyn jasaý deregi boiynsha is qaralyp jatyr", - delingen "Sot kabineti" materialdarynda.
Sot sportshyny negizgi sot talqylaýyna qatysý úshin Pavlodardyń qylmystyq ister jónindegi aýdanaralyq sotyna etaptaýǵa qaýly shyǵardy.
Is qaralyp jatqan bap 3 jyldan 7 jylǵa deiingi bas bostandyǵyn shekteý nemese aiyrý jazasyn qarastyrady.
Pavlodar oblysy dene shynyqtyrý jáne sport basqarmasynyń basshysy Azamat Imashevtiń aitýynsha, 42 jastaǵy erkin kúres sheberi Dáýlet Shabanbai sporttyq mansabyn bes jyl buryn Qazaqstan chempionatynda ekinshi oryn alǵan soń aiaqtaǵan.
Dáýlet Shabanbai týraly ne belgili?
Onyń eń iri jetistikteriniń biri - 2012 jyly Londonda ótken Jazǵy Olimpiada oiyndarynyń qola medali. Alaida sportshy bul marapatty tek 2022 jyly Belgradta alǵan, óitkeni Olimpiadanyń eki júldegeri tyiym salynǵan preparattardy qoldanǵany úshin diskvalifikatsiialanǵan. Sol kezde 120 kelige deiingi salmaqta besinshi oryn alǵan qazaqstandyq úshinshi orynǵa kóterilgen.
Dáýlet Shabanbai - Aziia chempionattarynyń tórt dúrkin qola jáne kúmis júldegeri (2008, 2009, 2011, 2014, 2016). Sondai-aq 2014 jyly Aziia oiyndarynyń kúmis medalin jeńip alǵan.
"Sot kabineti" derekterine sáikes, 2018 jyly Jekpe-jek federatsiiasynda sport nusqaýshysy bolyp jumys istep júrgen kezde Shabanbai jol apatynan bir adamdy óltirip alǵan dep aiyptalǵan. Úkimde sol kezde belsendi sportshy basqarǵan LADA kóligi kópirde turǵan Audi-80 avtokóligine soǵylǵany jazylǵan. Sheteldik kóliktiń 51 jastaǵy jolaýshysy oqiǵa ornynda kóz jumǵan. Apat Pavlodarda bolǵan.
Sol kezde Shabanbai prokýrormen kinásin tolyq moiyndaý týraly protsestik kelisim jasaǵan. Marqumnyń jubaiyna bir million teńgeden asa materialdyq shyǵyndy ótep, ol eki jyl shartty jaza alyp, bes jylǵa júrgizýshi kýáliginen aiyrylǵan.
