Pavlodar oblysynda 12 jastaǵy mektep oqýshysy seksýaldyq sipattaǵy qysym týraly sabaqtan keiin anasyna ógei ákesi tiiskenin aitqan. Politseiler sotaldy tergeý júrgizip jatyr, - dep habarlaidy Massaget.kz.
Jasóspirimniń anasynyń sózinshe, mekteptegi sabaq pen muǵalimniń saýatty túsindirýi arqasynda qaiǵyly oqiǵa bolmaǵan. Áieldiń aitýynsha, intim, jynystyq sipattaǵy qysym jáne zorlyq-zombylyq degen ne ekeni aitylǵan synyp saǵatynan keiin qyzy alty jasynan bastap "áke" dep atap júrgen ógei ákesi qorlaǵanyn aitqan.
"Qyzymnyń aitýynsha, bul bir jarym jyl buryn bolǵan. Ol kezde páterimizdi jóndegen edik, biz onyń tósegin qonaq bólmege shyǵardyq. Sol kúni keshke kenje qyzymdy jatqyzýǵa ketkenimde úlkeni ógei ákesimen zalda qaldy, ol teledidar qarap, al qyzym telefon qarap otyrǵan. Qyzym ákesi tósekke otyryp, sipalai bastaǵanyn aitty, keiin bul olardyń qupiiasy ekenin aitqan. Qyzym ony iterip jiberip, jýynatyn bólmege qashyp ketken. Kelesi kúni ol oǵan aqsha bergen. Sodan keiin maǵan úige kómektesetinin, sińlisin qaraitynyn aityp, jii aqsha berip turǵan. Qyzymnyń áńgimesin tyńdap otyryp, ol sol kezde ógei ákesiniń áreketin túsindire almaǵanyn baiqadym. Qazir kóp adam "Oi, bul baiaǵyda bolǵan ǵoi" deidi jáne tergeý de sony alǵa tartady. Ol kezde bala munyń qysym ekenin, jaman ekenin bilmedi", - deidi qyzdyń anasy.
Sol kúni keshke áiel kúieýin qýyp jibergen, al birneshe kúnnen keiin politsiiaǵa baryp aryz jazǵan jáne sol kezde ajyrasýǵa ótinish bergen.
"Ol osy qorqynyshty oqiǵany moiyndaǵannan keiin qyzymmen birneshe kún sóilestim. Odan da qorqynyshty nárseni estýden qoryqtym, ol maǵan bárin aitpasa dep oiladym. Baqytymyzǵa orai, kúieýim oǵan ziianyn tigizip úlgermegen. Bala odan ári únsiz qalsa, ne bolýy múmkin ekenin elestetý tipti qorqynyshty. Qyzyma bárin aityp bergenine, balalarǵa qajet ári mańyzdy aqparatty durys jetkize alǵan jáne sol arqyly otbasymyzda bolýy múmkin oqiǵanyń aldyn alǵan synyp jetekshisine alǵys", - deidi mektep oqýshysynyń anasy.
Al er adam eshnársege kináli emesin aityp, áielin jala japty dep aiyptaǵan.
"Biz eki saraptamadan óttik. Qyzym alda poligraftan ótýi kerek. Men balama senemin. Ana retinde balamnyń qiialyn ótirikten nemese jala jabýdan ajyrata alamyn. Kúieýim, árine, bárin joqqa shyǵaryp otyr. Kenje qyzymyzdy balabaqshadan alyp jatqanda ony menen alyp ketýge tyrysty. Qyzymdy kórsetýge tyiym saldy dep, qamqorshylyq organdaryna shaǵymdandy. Bolǵan oqiǵadan keiin oǵan qalai senemin? Erteń ol týǵan qyzyna da tiisse. Ol maǵan, týystaryma qaýip tóndire bastaǵannan keiin qorǵanys týraly buiryq shyǵarýdy ótindim. 28 qarashada onyń merzimi bitedi. Biraq osy ýaqyt ishinde qorlaý, qorqytý týraly habarlama alyp júrdim. Ol ártúrli telefon nómirinen qońyraý shalyp, habarlama jiberedi", - deidi áiel.
Pavlodar oblysy Politsiia departamenti oblysy turǵynynyń ótinishi boiynsha QR Qylmystyq kodeksiniń 124-babynyń 2-bóligi boiynsha sotaldy tergeý júrgizilip jatqanyn habarlady.
Osy baptyń sanktsiiasy boiynsha ómir boiy belgili bir laýazymdardy atqarý nemese belgili bir qyzmetpen ainalysý quqyǵynan aiyryp, koloniiaǵa 10-15 jyl merzimge otyrý jazasy qarastyrylǵan.
Aita keteiik, tergeý aýyr bap boiynsha qarastyrylyp jatqanyna qaramastan, mektep oqýshysynyń ógei ákesi áli de bostandyqta.
