Pavlodar oblysynda et óndirisin jyl saiyn 10 paiyzǵa arttyrý kózdelip otyr. Bul týraly OKQ-da ótken baspasóz máslihatynda Pavlodar oblysynyń ákimi Ábilqaiyr Sqaqov málim etti, dep habarlaidy "Ult aqparat".
«Agroónerkásip keshenine jeke toqtalaiyn. Óńirdiń jalpy ishki óniminde AÓK salasynyń úlesi 8,8 paiyzdy qurap otyr. Bul indýstriialy oblys úshin aitarlyqtai jaqsy kórsetkish. Osy sebepti aýyl sharýashylyǵy esebinen ekonomikany ártaraptandyrý múmkindigine ie boldyq. Bul turǵyda damytýǵa bolatyn úsh baǵyt bar. Olar: sýarmaly jerdi igerý, sút pen et óndirisin jolǵa qoiý», - dedi Ábilqaiyr Sqaqov OKQ-da ótken baspasóz máslihatynda.
Onyń aitýynsha sýarmaly jerdiń aýmaǵy biyl 121 myń gektarǵa ósken.
«Myna bir málimetti keltireiin: 52 myń gektarlyq sýarmaly jerden sýarylmaǵan 900 myń gektardan alynǵan ónimge teń egin jinaldy. Oilap qarasańyz 17 ese az jer. Iaǵni sýarmaly jerdiń kólemin arttyrý jumysy aýyl sharýashylyǵynyń ósimin qamtamasyz etedi», - dedi ákim.
Aimaq basshysy sonymen qatar et jáne sút óndirisine qatysty pikir bildirdi.
«Biyl 7 sút-taýarly ferma iske qosylsa, aldaǵy úsh jylda taǵy 15-in ashamyz. Bul sút óndirisiniń ónerkásibiniń ósimin 60 paiyzǵa deiin arttyrady. Biyl oblys 4,4 myń siyrdy importtady. Aldaǵy jyly 5 myń basqa arnalǵan bordaqy alańyn salýdy kózdep otyrmyz. Al biyl jergilikti qus fabrikasy kúrketaýyq etiniń óndirisin jolǵa qoiady. Mundai óndiris oshaǵy Qazaqstannyń eki jerinde ǵana bar. Osylaisha, Pavlodar oblysynda et óndirisin jyl saiyn 10 paiyzǵa arttyrý kózdelip otyr», - dedi ol.
