Pavlodar aýdandyq soty aiyptalýshyny áielin qasaqana órtep jibergeni úshin kináli dep tanyp, 8 jylǵa bas bostandyǵynan aiyrdy, - dep habarlaidy Tengrinews.kz agenttigi.
Is materialdaryna sáikes, oqiǵa biyl tamyzda bolǵan. Rozovka aýylynda otbasylyq janjal kezinde er adam tońazytqyshtan ishimdik alyp, áieliniń ústine shashyp, ottyqpen órtep jibergen. Erli-zaiypty arasyndaǵy kikiljiń áieli kúieýine mas kúide kólik júrgizýge tyiym salǵan soń týyndaǵan. 34 jastaǵy jábirlenýshi jansaqtaý bólimine túsip, keiin qaitys boldy.
"Sottalýshy adam ólimine ákep soqtyrǵan densaýlyqqa qasaqana aýyr ziian keltirgeni úshin kináli dep tanyldy. Ol 8 jylǵa bas bostandyǵynan aiyryldy", - dedi Pavlodar oblystyq sotynyń baspasóz qyzmeti ókilderi.
Sot otyrysynda er adam óz kinásin tolyq moiyndap, oqiǵaǵa qatysty óz nusqasyn aitty. Onyń aitýynsha, áielimen janjaldasyp qalǵannan keiin tatýlasyp, as úide salattar daiyndaýǵa kirisken. Bankalardy zararsyzdandyrmaý úshin spirtpen súrtýdi usynyp, ol úshin tońazytqyshtan bir bótelke alkogoldi alyp, ústeldiń ústine ashyq qaldyrǵan. Bótelke keiinirek qulap, onyń jáne jubaiynyń ústine tógilgen. Er adamnyń aitýynsha, keiin ol áielinen adam qalai janatynyn kórgisi kele me dep surap, ázildep ózin órtep jibergen. Qolyndaǵy otty sóndire bastaǵanda, ushqyndar edenge túsip, keiin jalyn áieline taraǵan. Ol áieliniń ústine sý quiyp, jedel járdem shaqyrǵan.
Sot aiyptalýshynyń bergen jaýabyna kúdikpen qarady.
Aita keteiik, jábirlenýshi tarap aiyptalýshyǵa eń tómengi merzim berýdi talap etken.
"Sot jazany jeńildetetin mán-jai retinde kinásin moiyndaý, shyn júrekten ókiný, tergeýge belsendi kómek kórsetý, sottylyǵynyń joqtyǵy jáne eki kishkentai balanyń bolýyn eskerdi", - dedi sottyń baspasóz qyzmet ókilderi.
