Foto: ashyq derekkóz
Pavlodar oblysynyń prokýrorlary halyqty qoljetimdi internetpen jáne turǵyn úimen qamtamasyz etýge arnalǵan memlekettik baǵdarlamalar aiasynda oryn alǵan keń kólemdegi sybailas jemqorlyq faktilerin anyqtady, dep habarlaidy Ult.kz.
Oblystyq prokýratýranyń málimetinshe, memlekettik apparatty tsifrlandyrý men áleýmettik saladaǵy jobalardyń iske asýyn tekserý barysynda laýazymdy tulǵalar tarapynan memleketke jarty milliard teńgeden astam zalal keltirgen zańbuzýshylyqtar áshkerelengen.
Máselen, aqparattandyrýdy damytý óńirlik ortalyǵyna júrgizilgen tekserý nátijesinde 110 mln teńge biýdjet qarjysy naqty kórsetilmegen qyzmetter úshin zańsyz tólengen. Atap aitqanda, aýyldyq eldi mekenderdi internetpen qamtý men jer jáne sáýlet salasyndaǵy tsifrlandyrý tek «qaǵaz júzinde» oryndalǵan.
Sondai-aq Aqsý qalasynda áleýmettik turǵyn úi qurylysy aiasynda 450 mln teńge somasynda taýarlar men jumystar úshin jalǵan málimetter negizinde merdigerge tólem jasalǵany belgili boldy. Nysan áli kúnge deiin paidalanýǵa berilmegen.
Qazir bul derekter boiynsha isti oblystyń arnaiy prokýrorlary tergep jatyr. Qylmystyq-protsestik kodekstiń 201-babyna sáikes tergeý múddesine orai ózge málimetter jariialanbaidy.
