Pavlodar oblysynda jedel járdemge túsetin shaqyrýlar sany 50 paiyzǵa azaidy. Bul týraly onlain apparattyq jiynda oblys ákiminiń orynbasary Aizada Qurmanova málim etti dep habarlaidy Pavlodarnews.kz.
- Ótken aptada Moiyldydaǵy provizorlyq 500 oryn, Aqsýdaǵy «Eýraziia» meditsinalyq ortalyǵyndaǵy 80 oryn, «Baiantaý» sport saraiyndaǵy 150 oryn jabyldy. Qazirgi ýaqytta provizorlyq oryndardyń 26,5 paiyzynda naýqastar jatyr, - dedi Aizada Qurmanova.
Sonymen qatar, shilde aiynyń basynda jedel járdemge kelip túsetin shaqyrý sany 1128 bolsa, bul kórsetkish 50 paiyzǵa qysqaryp, ótken táýlikte 565 shaqyrýǵa azaiǵan.
Oblys aýmaǵynda karantin talaptaryn 30 monitoring toby baqylaidy. 27 shilde men 2 tamyz arasynda 30 tekserý júrgizilip, 27 ereje buzýshylyq anyqtalǵan. Atalǵan faktilerge qatysty 19 ákimshilik quqyqbuzýshylyq hattamasy toltyryldy.
Oblys ákimi Ábilqaiyr Sqaqov óńirde koronavirýsqa qatysty jaǵdai turaqtalyp kele jatqanymen bosańsýǵa bolmaitynyn atap ótti.
- Kúzge daiyndalýymyz kerek. Tájiribemiz bar. Naqty sharalardyń josparyn quryp, kúz kelmei turyp dál qazir ne isteitinimizdi, meditsina salasynyń tolyq daiyndyǵy úshin qandai qosymsha amal qoldanatymyzdy bekitý qajet, - dedi oblys ákimi.
Aita keteiik, qazirgi ýaqytta Pavlodar oblysynda koronavirýs juqtyrǵan 3359 adam anyqtalǵan. 2022 adam jazylyp shyqsa, 28 adam kóz jumdy.
