Qazaqstan Reseidiń gaz tasymaldaý júiesine qosylý boiynsha "Gazprom" kompaniiasymen kelissóz júrgizýde. Áńgime Pavlodar oblysyn gazdandyrý jaily bolyp otyr, dedi Premer-ministr Asqar Mamin.
"Pavlodar oblysyn gazdandyrýǵa qatysty biz eki nusqany qarastyryp jatyrmyz: "Saryarqa" jobasyn odan ári damytý, sondai-aq ekinshi jáne úshinshi kezeń esebinen Pavlodar oblysyn gazdandyrý. Basqa nusqa da bolýy múmkin, qazir "Gazprom" kompaniiasymen reseilik gaz tasymaldaý júiesine qosylý jaiy talqylanýda", - dedi Mamin Senat otyrysynda.
Maminiń málimdemesine Senat spikeri Dariǵa Nazarbaeva pikir bildirdi.
"Árqashan qor bolǵany durys. Bul jergilikti de, reseilik gazǵa da qatysty. Gazǵa táýeldilikke urynbaý úshin eki jaqty oilanýymyz kerek", - dedi ol.
Senator Sergei Plotnikov Maminge qarata aitqan sózinde, "Saryarqa" gaz qubyrynyń qurylysy 2018 jyldyń jeltoqsan aiynda bastalǵanyn atap ótti.
"Sonymen birge, Shyǵys Qazaqstan men Pavlodar oblystaryn gazdandyrý máselesi ashyq kúiinde qalyp otyr. Shyǵys Qazaqstan ákimdigi Zaisan aýdanynyń turǵyndaryn jergilikti Sarybulaq ken orny esebinen gazdandyrý jumystaryn júrgizýde. Biraq onyń qory az jáne eldiń shyǵysyndaǵy ónerkásiptik aimaqtyń suranysyn qanaǵattandyra almaidy", - dedi Senat depýtaty.
