Elordada aýyl sharýashylyǵy jármeńkesi ótip jatyr. Osy demalys kúnderi «Han Shatyr» SOO janyndaǵy alańda Pavlodar oblysy 550 tonna óz ónimin usyndy. Mundaǵy baǵa naryq qunynan 10-15%-ǵa tómen, dep habarlaidy qala ákimdiginiń resmi saity.
Pavlodar oblysy ylǵi da kókónisimen, etimen tanymal bolǵan. Elorda turǵyndaryna qajetti azyq-túlik osy demalys kúnderi tańǵy 9-dan 18:00-ge deiin satylady.
«Biz 550 tonna aýylsharýashylyq ónimderin ákeldik. Negizinen bul kartop, sábiz, et jáne t.b», – dedi Pavlodar oblysy Aýyl sharýashylyǵy basqarmasynyń basshysy Nurbolat Maqashev.
«Biz jármeńke týraly san márte estidik. Biraq baratyn múmkindigimiz bolmady. Al búgin ýaqyt taýyp kelip otyrmyz. Jármeńkeniń apta saiyn ótetini jaqsy», – dedi elorda turǵyny Ásemgúl.
Pavlodar oblysy taýar ákelip qana qoimai, qazaq dalasynda tanymal bolǵan jármeńkeler jaily tarihtan syr shertti. Arnaiy stend uiymdastyryldy, onda talantty ónerpazdar óz ónerin ortaǵa saldy, kúmbirlegen kúi oryndalyp, jármeńkelerdiń dástúri men tarihy týraly aitty.
«Pavlodar kartobymen tanymal. Assortimenttiń úlken toby – kókónis toby. Sondai-aq, oblys bakaleia, et-sút ónimderin ákeldi. Jármeńke barysynda 3 myń tonnaǵa jýyq ónim satyldy. Respýblikanyń barlyq óńirinen 420-dan astam kásipker qatysty», – dedi Nur-Sultan qalasy Kásipkerlik basqarmasynyń basshysy Rýslan Ydyrysov.
Mundai jármeńkeler qala turǵyndary úshin taýarlardy qolaily baǵamen satyp alýǵa tamasha múmkindik beredi.
Jármeńkede sanitarlyq normalar tolyqtai saqtalǵan. Yńǵaily bolý úshin munda qozǵalys baǵyty da kórsetilgen, áleýmettik qashyqtyqty saqtaýǵa arnalǵan belgiler de joq emes, al týrniketterde qol gigienasyna arnalǵan sanitaizerler ornatylǵan. Sondai-aq, kelýshilerge karantindik sharalardy, onyń ishinde maska rejimin saqtaýdy eske salatyn bannerler bar.
Elordada biyl áleýmettik mańyzy bar azyq-túlik ónimderiniń baǵasyn turaqtandyrý úshin kókónister men jemisterdiń pisý ýaqytyna sai 14 jármeńke ótkizý josparlanǵan. Aýyl sharýashylyǵy óńirlik jármeńkeleriniń maýsymy Nur-Sultanda 31 qazanǵa deiin jalǵasady. 21 tamyzdan bastap elordadaǵy jármeńkelerde Túrkistan, Batys Qazaqstan, Shyǵys Qazaqstan, Qyzylorda, Almaty, Atyraý, Mańǵystaý, Jambyl, Aqtóbe jáne Qaraǵandy oblystarynyń aýylsharýashylyq taýar óndirýshileri óz ónimderin usyndy.
