Pavlodarda mektepte órt shyǵyp, 15 jastaǵy oqýshy zardap shekti. Tótenshe jaǵdaidan keiin qyz basy qatty aýrǵanyna shaǵymdanǵan. Jedel járdem oqýshy qyzdy aýrýhanaǵa jetkizdi, - dep habarlaidy Tengrinews.kz.
"21 sáýirde saǵat 19.28-de Pavlodar qalasyndaǵy oblystyq balalar aýrýhanasyna 2007 jyly týǵan 8 "B" synyp oqýshysy júgindi. Órt kezinde ol sabaqta bolǵan. Evakýatsiiadan keiin úiine qaitqan, al keshke jaǵdaiy nasharlaǵan", - dedi oblystyq Bilim basqarmasy ókilderi.
Muǵalimderdiń aitýynsha, zardap shegýshi kómirqyshqyl gazyna ýlanyp qalýy múmkin.
Oblystyq Densaýlyq saqtaý basqarmasy málimetinshe, qyz somatikalyq bólimde jatyr.
"Bala infýzion terapiia alyp jatyr. Jaǵdaiy turaqty", - dedi vedomstvo ókilderi.
Buǵan deiin 47 jastaǵy fizika pániniń muǵalimi órtten zardap shekkeni habarlanǵan bolatyn. Kómirqyshqyl gazynan ýlanǵan áiel aýrýhanaǵa jetkizilgen.
2020 jyly mektepke 200 million teńgege jýyq qarjyǵa kúrdeli jóndeý júrgizilgen. Ǵimarattyń edeni, shatyry, jylý, sý jáne káriz júieleri aýystyrylǵan. Bilim basqarmasy málmetinshe, jóndeý jumystary "Zamanaýi mektep" jobasynyń jol kartasy aiasynda júrgizilgen.
Aita keteiik, oblys ákimi Ábilqaiyr Sqaqov órt shyqqan orynǵa baryp, órt sóndirilgennen keiin birden tótenshe jaǵdailar jónindegi shtab otyrysyn ótkizdi. Keiin ol Instagram-paraqshasynda bul fakt boiynsha tergeý júrip jatqanyn jazdy.
