Foto: inform.kz
2024 jyly qazaq halqynyń uly perzenti, tuńǵysh akademik Qanysh Sátbaevtyń mereitoiy keńinen atalyp ótedi. Bul jaiynda Premer-Ministr Álihan Smaiylovtyń Senat depýtattarynyń saýalyna bergen jaýabynda aitylǵan, dep habarlaidy QazAqparat.
«Qanysh Imantaiuly Sátbaevtyń mereitoiyn atap ótý bastamasyn qoldaimyz. Bul rette 2023-2025 jyldarǵa arnalǵan mereitoilar men ataýly kúnderdiń tizbesine sáikes, Qanysh Sátbaevtyń 125 jyldyq mereitoiyn daiyndaý jáne ótkizý sharalary 2024 jylǵa josparlanyp otyr. Mereitoidy uiymdastyrýǵa jáne ótkizýge jaýapty oryndaýshy - Ǵylym jáne joǵary bilim ministrligi», - deidi Úkimet basshysy jaýabynda.
Onyń atap ótýinshe, ministrlik jalpy respýblikalyq is-sharalar josparyn ázirleý jáne bekitý máselesin pysyqtaýda.
«Sizder usynyp otyrǵan is-sharalar zańnamada belgilengen tártippen respýblikalyq jáne jergilikti biýdjetterdiń múmkindikterin eskere otyryp, atalǵan jospardy ázirleý kezinde qaralady», - dedi Álihan Smaiylov.
Aita keteiik, senatorlar depýtattyq saýalynda qazaq halqynyń birtýar perzentine laiyqty qurmet kórsetý jáne qisapsyz ushan-teńiz eńbegin keńinen nasihattaý maqsatynda Astana qalasynda «Sátbaevtaný» ortalyǵyn ashý, týǵan eli Pavlodar qalasynyń áýejaiyna akademik Qanysh Sátbaev esimin berý, alǵashqy akademiktiń 10 tomdyq tolyq jinaǵy men 5 tomdyq akademiialyq shyǵarmalar jinaǵyn daiyndaý jáne entsiklopediiasyn tolyqtyryp, jańadan eki tilde shyǵarý, rýhaniiat janashyry bolǵan ǵulama týraly tolyqmetrajdy kórkem-derekti film túsirý jáne qairatkerge arnalǵan Qazaqstandaǵy mýzeilerdi zamanaýi qalypqa keltirý, kindik qany tamǵan jerde memorialdyq keshen turǵyzý jáne buǵan deiingi depýtattyq saýalda kóterilgen 30 kilometrlik týristik joldy salýdy bastaý; qazaq eliniń taýtulǵalary arqyly memleketimizdi shetelde kórsetý turǵysynan «Meniń halqym menen de biik» degen Ulybritaniiada ataqty Ý.Cherchillge aitqan sózderiniń kezdesý sátin beineleý maqsatynda elordada eskertkish qoiýdy qarastyrý usynylǵan edi.
