Foto: Liter.kz
Qazaqstan Respýblikasynyń Táýelsizdik kúnine orai birqatar júrgizýshiler kólikterin Memlekettik týmen bezendirip, jolǵa shyqqan. Osyǵan bailanysty Ishki ister ministrligi jol qozǵalysyna qatysýshylarǵa qaýipsizdik talaptaryn qatań saqtaýǵa shaqyrdy, dep habarlaidy Ult.kz.
IIM málimetinshe, kólikke Memlekettik týdy ornalastyrǵany úshin zańnamada jaýapkershilik qarastyrylmaǵan. Alaida merekelik is-sharalar kezinde keibir azamattar jol qozǵalysy erejelerin buzyp, ózge júrgizýshilerge kedergi keltirip, kóshelerdi ýaqytsha jaýyp tastaǵan. Mundai jaǵdailarda politsiia qyzmetkerleri zań talaptaryna sáikes shara qoldanýǵa májbúr bolǵan.
Máselen, 16 jeltoqsanda Shymkent pen Almaty qalalarynda jol erejelerin buzǵan, kólikterine tý ilgen birneshe júrgizýshi toqtatylǵan. Tekserý barysynda olardyń keibiri kólikti basqarý quqyǵynsyz júrgizgeni, apattyq jaǵdai týǵyzǵany jáne kólikti zańsyz jabdyqtaǵany anyqtalyp, ákimshilik jaýapkershilikke tartyldy. IIM bul sharalardyń Memlekettik týdy paidalanýǵa qatysy joq ekenin atap ótti.
Sonymen qatar Almaty qalasynda politsiia qyzmetkerleri sharlarmen bezendirilgen qoǵamdyq kólikke qatysty túsindirý jumystaryn júrgizip, onyń adam ómiri men densaýlyǵyna qaýipti ekenin eskertken. Kólikti zańsyz toqtatýǵa bailanysty derekter de tekserilip jatyr. Kináli qyzmetkerler tártiptik jaýapkershilikke tartylady.
IIM azamattardy memlekettik rámizderge qurmetpen qarap, jol qozǵalysy erejelerin saqtaýǵa jáne tek resmi aqparat kózderine senýge shaqyrdy.
