Qazaqstanda kóptegen eldermen salystyrǵanda jyljymaityn múlikke ielik etý koeffitsienti aitarlyqtai jaman emes. 2020 jylǵy tańdalmaly zertteý nátijesi boiynsha, úi qojalyǵy bar turǵyn úidiń 86,8% otbasy múshesine kiretinderdiń birine tiesili boldy. Salystyrmaly túrde: Reseide bul kórsetkish 89%, dep habarlaidy QazAqparat energyprom.kz saitynasilteme jasap.
Jyljymaityn múlikke ielik etý koeffitsienti boiynsha reitingige engen úzdik elder - Rýmyniia (95,8%), Majarstan (91,7%) jáne Chernogoriia (91%). Jartylai moiyndalǵan Kosovo memleketinde bul kórsetkish 97,8% jetti. Eń tómengi kórsetkish – Shveitsariiada (41,6%), Gonkongte (49,8%) jáne Germaniiada (50,4%). Eýropalyq elderde baspanany jalǵa alý úlesi dástúrli túrde joǵary jáne ol qalypty jaǵdai sanalady: EO boiynsha jyljymaityn múlikke ielik etý koeffitsienti 69,8% quraǵan.
Sonymen qatar, QR-da damyǵan eldermen salystyrǵanda baspana adam basyna shaqqanda 23 sharshy metrge jýyqtan keledi (Germaniiada – 39 sh.m, Ulybritaniiada – 70 kv.m).
QR-da úi sharýashylyǵynyń ortasha kólemi qalada úsh adamdy jáne aýyldyq jerlerde tórt adamdy quraidy. Halyqtyń 26% úi sharýashylyqtarynda bes jáne odan da kóp adamnan turady. Sondai-aq balaly árbir onynshy úide kem degende tórt baladan bar. QR-daǵy bebi-býmnyń ósip jatqanyn esepke alǵanda, olardyń árqaisysyna baspana qajet. Sondyqtan, baspana máselesi elde ózekti bolyp otyr.
Bir jaǵynan, QR-da azamattardy baspanamen qamtýdy arttyrý úshin túrli memlekettik baǵdarlamalar men damý institýttary bar, al ekinshi jaǵynan – bul jetkiliksiz.
Qazaqstan qurylys salýshylar qaýymdastyǵynyń málimetinshe, QR-daǵy árbir úshinshi páter memlekettik baǵdarlamamen satyp alynýda. Alaida, ár baǵdarlamanyń quny men merzimi boiynsha shekteýi bar. Keibir tanymal memlekettik baǵdarlamalar («Baspana hit») aiaqtalyp jatyr.
Kapital.kz habarlaýynsha, Ulttyq bank basshysy Erbolat Dosaev bylai dep eskertti: «Ekonomikany qalpyna keltirý qarqynyn esepke ala otyryp, negizgi baǵdarlamalar 2023 jyldyń sońyna qarai merziminen buryn aiaqtalatynyn joqqa shyǵarmaimyz». Bul «7-20-25» baǵdarlamasyna da qatysty. Baǵdarlamaǵa bólingen 1 trln teńgeniń tek 400 mlrd teńgesi ǵana igerilgenin aita keteiik.
