QR Indýstriia jáne infraqurylymdyq damý ministrligi qurylys jáne turǵyn úi-kommýnaldyq sharýashylyq isteri komiteti tóraǵasynyń orynbasary Erkebulan Daýylbaev kóppáterli turǵyn úilerden qosymsha tabys tabý joldaryn túsindirdi, dep habarlaidy QazAqparat.
«Is júzinde páterler ieleriniń kooperativteriniń, basqarýshy kompaniialardyń basshylary jáne kóppáterli turǵyn úilerdi basqarýmen ainalysatyn basqa da tulǵalar, paidalanýdaǵy ortaq múliktiń jekelegen bólikterin jalǵa nemese paidalanýǵa berý arqyly qosymsha tabys taba alady. Muny páterlerdiń, turǵyn emes úi-jailardyń menshik ieleri bilmeýi múmkin. Sondyqtan páter, turǵyn emes úi-jailar ieleri, jańadan qurylǵan múlik ieleri birlestikteri men jai seriktestikter kóppáterli turǵyn úidiń qandai tabys pen paida ákeletinin bilýi mańyzdy», - dedi E. Daýylbaev Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, tabystyń negizgi kózderi – jarnama, jabdyqtardy ornatý jáne úi-jailardy jalǵa berý.
«Osylaisha, liftidegi jáne úi syrtyndaǵy jarnamalar, tóbede ornatylǵan antenna nemese basqa jabdyqtar kóppáterli turǵyn úidiń qosymsha tabysy bola alady. Qosymsha kirister kondominiým obektisiniń ortaq múlkin basqarýǵa jáne kútip-ustaýǵa jumsalýy tiis jáne bul týraly aqparat árbir turǵynǵa beriletin ai saiynǵy esepte kórsetilýi qajet.
Basqarýdyń jańa formalaryn engizý árbir kóppáterli turǵyn úidegi páter ieleriniń, turǵyn emes úi-jailardyń múddelerin qorǵaýǵa, kondominiým obektisiniń ortaq múlkin kútip-ustaý sapasynyń deńgeiin arttyrýǵa múmkindik beredi, bul tutastai alǵanda turǵyn úi qorynyń saqtalýyn qamtamasyz etedi», - dedi Erkebulan Daýylbaev.
Aita keteiik, 2020 jyldyń basynan bastap «Keibir zańnamalyq aktilerge turǵyn úi-kommýnaldyq sharýashylyq máseleleri boiynsha ózgerister men tolyqtyrýlar engizý týraly» QR Zańy kúshine endi. Biylǵy 22 aqpandaǵy jaǵdai boiynsha kóppáterli turǵyn úidi basqarý boiynsha 1 735 uiym qurylǵan.
Basqarýdyń eski formalary 2022 jyldyń 1 shildesine deiin óz qyzmetin jalǵastyrady. Osy merzim aiaqtalǵan soń Qazaqstan Respýblikasynyń zańnamasynda belgilengen tártippen joiý rásimin júrgizýi tiis.
