Kelesi aida ótetin referendým qarsańynda Armeniianyń premer-ministri Nikol Pashinian aimaqtardy aralap, sailaýshylardy Konstitýtsiiaǵa ózgeris engizip, konstitýtsiialyq sot músheleriniń basym bóliginiń otstavkasyn qoldaýǵa shaqyrdy.
“5 sáýirde sailaý ýchaskesine baryp, Armeniiadaǵy sailaýda bolǵan barlyq alaiaqtyqqa jaýapty konstitýtsiialyq sotty taratýdy qoldaýǵa shaqyramyn” dedi Pashinian Megri qalasynda.
Eger jurt Konstitýtsiiaǵa engiziletin ózgeristerdi qoldasa, 2018 jylǵy jappai narazylyqqa deiin taǵaiyndalǵan konstitýtsiialyq sottyń jeti múshesi qyzmetinen ketedi. Al keiinirek taǵaiyndalǵan sottyń eki múshesi óz qyzmetinde qalmaq.
Basym bóligi Pashiniannyń blogy ókilderinen quralǵan Ulttyq assambleia konstitýtsiialyq sottyń jańa jeti múshesin maquldaýy tiis.
Megride jurt aldynda sóilegen Pashinian konstitýtsiialyq sot “halyqtan alshaqtap ketti” jáne “Armeniia konstitýtsiiasymen sáikes kelmeitin elde qalǵan jalǵyz institýt” dedi. Ol jeti sýdiany Armeniianyń burynǵy basshylaryn qoldap, táýelsiz sot júiesin qurýǵa kedergi keltirdi dep aiyptady.
Al referendýmnyń Konstitýtsiiaǵa qaishy ekenin aitqan oppozitsiia ókilderi premer-ministr konstitýtsiialyq sotty ózine baǵyndyrýǵa tyrysyp jatyr dep synady.
Jeltoqsan aiynda konstitýtsiialyq sot tóraǵasy Grair Tovmasian "ádilet ministri bolyp turǵan kezde bilik ókiletin asyra paidalandy" dep aiyptalǵan edi. Tovmasian ózine taǵylǵan aiyptardy joqqa shyǵaryp, ózin saiasi sebeppen qýdalap otyrǵanyn málimdegen.
