Armeniia premer-ministri mindetin atqarýshy Nikol Pashinian Qaraǵandyda bolǵan oqiǵaǵa qatysty óz oiyn aitty. Bul týraly Azattyqtyń Armian qyzmeti habarlady.
"Qaza bolǵan adamnyń jaqyndaryna kóńil aitamyn jáne bul oqiǵada ultaralyq sipat joq. Maǵan jetken aqparat boiynsha, tóbeleskender ár ulttyń ókili bolǵan. Tóbeleskender arasynda qazaq ta bolǵan. Bul tóbeleste ultaralyq arazdyq boldy dei almaimyn" dedi ol.
Pashinian Armeniia basylymdary bul jaǵdaiǵa qatysty aqparat taratqanda barlyq faktini tekserý kerektigin eskertti.
7 qańtarda Armeniianyń syrtqy ister ministrligi de Qaraǵandydaǵy oqiǵaǵa qatysty málimdeme jasaǵan. Qazaqstan syrtqy ister ministri Beibit Atamqulov pen Armeniia syrtqy ister ministri Zograb Mnatsakanian telefon arqyly sóileskeni habarlandy.
Jańa jyl túni Qaraǵandydaǵy meiramhanalardyń birinde tóbeles bolyp, bir adam qaza taýyp, tórt adam jaraqattanǵan. Barlyǵy jeti adam ustalǵan. Taǵy bir adam Narek Gýrýrianǵa halyqaralyq izdeý jariialanǵan.
6 qańtarda Qaraǵandyda júzdegen adam "qylmyskerdi" tabýdy talap etken. Qaraǵandy oblysy ákimi Erlan Qoshanov izdeý jumystary júrip jatqanyn aitqan.
