Armeniia parlamentindegi oppozitsiialyq depýtat, qarsylyq qozǵalysynyń jetekshisi Nikol Pashinian eger halyq qalasa, eldi basqarýǵa daiyn ekenin málimdedi. Birinshi dúniejúzilik soǵys jyldarynda Osman imperiiasynda armiandardyń jappai qyrylǵanyn eske alatyn 24 sáýir kúni myńdaǵan adamdy Erevandaǵy eskertkish keshenge bastap barǵan Pashinian jýrnalisterge Serj Sargsian basqaratyn Respýblikalyq partiianyń "biligi aiaqtalǵanyn" aitty, dep jazady Azattyq.
25 sáýirde Pashinian men premer-ministr mindetin atqarýshy Karen Karapetian úsh million halqy bar Armeniiadaǵy jaǵdaidy retteý joldaryn talqylaidy dep kútilip otyr.
Biraq Pashinianniń "Azamattyq kelisim" partiiasynyń basqarma múshesi Tigran Avinian keshe Azattyqqa ol kezdesýdiń bolmaitynyn aityp, basqa kommentarii berýden bas tartqan.
Pashinian buǵan deiin 25 sáýirdegi kelissózde "bilikti eshbir kúizelissiz tapsyrý" máselesi talqylanýy tiis ekenin málimdegen. "Respýblikalyq partiianyń bir de bir ókili premer-ministr bolmaidy" dedi Pashinian.
Karapetian 24 sáýirde Armeniia prezidenti Armen Sarkisiannen eldegi saiasi jaǵdaidy jáne merziminen buryn parlament sailaýyn ótkizý yqtimaldyǵyn talqylaý úshin "parlamentke kiretin parlament quramynda joq barlyq saiasi kúshterdiń" kezdesýin uiymdastyrýdy suraǵanyn habarlaǵan.
23 sáýirde Armeniia premer-ministri Serj Sargsian otstavkaǵa ketken. Ol oppozitsiia 11 kún ózine qarsy sherý ótkizgen soń osyndai sheshim qabyldaǵan.
