«AMANAT» partiiasynyń Tóraǵasy, Májilis Spikeri Erlan Qoshanov Semei qalasyna jumys sapary barysynda partiia filialyna baryp, amanattyqtarmen kezdesti. Onda partiia Tóraǵasy Prezidenttiń Abai oblysyn qurý týraly tarihi sheshimi aimaqtyń áleýmettik-ekonomikalyq ómirine tyń serpilis ákeletinine nazar aýdaryp, bul filial jumysyn da jandandyra túsetinin aitty, dep habarlaidy "Ult aqparat".
Jiynda Erlan Qoshanov Prezident reformalaryn halyqqa túsindirýde «AMANAT» partiiasynyń músheleri osy jumystyń aldyńǵy shebinde júrýge tiis ekenin atap ótti.
«Jalpy alǵanda bul reformalar qoǵam tarapynan jan-jaqty qoldaý tabýda. Óitkeni, ózgerister eń áýeli halyqtyń suranysyna negizdelgen. Memleket basshysynyń reformalary ár adamǵa teń múmkindik berýge, ádiletti qoǵam qurýǵa baǵyttalǵan», – dedi ol.
Sonymen qatar partiianyń aldynda aýqymdy mindetter turǵanyna erekshe mán berdi.
«Memleketimiz jańa kezeńge qadam basqaly tur. Halyqtyń da kózqarasy ózgerýde. «AMANAT» bul protsesterden shet qalmaýy qajet. Partiianyń baǵyt-baǵdaryn Prezidenttiń ózi aiqyndap berdi. Bizge jasandylyqtan, biýrokratiia men kózboiaýshylyqtan arylǵan jón. Biz naqty istermen ainalysýymyz kerek», – dedi partiia Tóraǵasy.
Erlan Qoshanov «AMANAT» partiiasy halyqtyń múddesin qorǵaityn partiia ekenin aita kele, óńirlerdegi birqatar máselege nazar aýdardy.
«Kóp jerde jaiylym máselesiniń ózektiligi artyp otyr. Biz osyǵan belsene kirisýimiz kerek. Májilis depýtattary bul jumysty bastap ketti. Endi jergilikti filialdarymyz da osyny sheshýge aralasqany jón», – dedi Erlan Qoshanov.
Sondai-aq kezdesýde partiia Tóraǵasy menshik ieleri birlestigi máseleleri áli kúnge deiin júieli sheshimin tappai otyrǵanyn atap ótti.
Erlan Qoshanovtyń pikirinshe, kóptegen qalada birlestikti engizý barysynda qiyndyqtar týyndap, turǵyndardyń kóńili tolmai otyr. Partiia jergilikti ákimdiktermen birge osy jumysqa belsene aralasýy kerek. Bastama kóterip, problemanyń sheshilý joldaryn usynýlary tiis.
Kezdesýde partiia Tóraǵasy jastardy jumyspen qamtý máselesin kóterip, mobildi qoǵamdyq qabyldaýlardyń jumysyn kúsheitý jóninde tapsyrma berdi.
«Birinshi kezekte, ol jumyssyz, mamandyqsyz, úisiz-kúisiz júrgen jastarǵa arnalýy kerek. Biz olardyń kelýin kútpei, ózimiz solarǵa qarai qadam jasaýǵa tiispiz. Myńdaǵan jasty qoldaýǵa baǵyttalǵan túrli memlekettik baǵdarlama bar ekenin kópshilik bilmeidi. Osy jumysty partiia filialdary basty nazarda ustaýy qajet dep esepteimin», – dedi Erlan Qoshanov.
