«Nur Otan» partiiasynyń jańǵyrý aiasynda qolǵa alǵan jobalary óz jemisin bere bastady. Atap aitqanda partiianyń kitaphanalardyń qyzmetin jańǵyrtý jobasy arqyly qaita jandanǵan Atyraý oblysynyń Inder aýdanyndaǵy kitaphana ǵimaratyndaǵy kovorking ortalyǵynda «Óz tilińdi qurmette» atty debattyq týrnir bolyp ótti.
Debatqa qatysýshylar ana tilimizdiń tazalyǵyn saqtaý, onyń deńgeiin kóterý jóninde aityp, latyn álipbiiniń zamanaýi innovatsiialyq qyzmeti týraly pikir almasty. Qazirgi ýaqytta uialy telefondarda jarnamalar, habarlamalar latyn álipbiimen jazylýda. Sonymen qatar internet jelisinde de latyn álipbiine aýdaratyn transkriptsiia ornatylǵan. Latyn álipbiine kóshý – túrki jáne jahandyq álemmen yqpaldasýǵa, ulttyq sanamyzdyń qaita jańǵyrýyna jol ashady degen oidamyn, – deidi debatqa qatysýshylardyń biri Jadyra Narimanova.
Partiianyń osyndai igi isterge muryndyq bolyp, Elbasy tapsyrmalaryn oryndaýdy basty maqsat tutatynyn aitqan «Nur Otan» partiiasy Inder aýdandyq filialy tóraǵasynyń birinshi orynbasary Ótepbergen Orazǵaliev búgingi is-sharanyń mańyzyna toqtalyp ótti.
– Óz basym búgingi urpaqtyń úsh til bilýin qoldaimyn. Memleketik til – memleket qurýshy ulttyń tili, al orys tili – resmi til ekeni belgili. Aǵylshyn tili búgingi ǵylym men tehnologiialardyń tili. Elbasymyz da osy máselege únemi nazar aýdaryp keledi. Sondyqtan álemdik ǵylymnyń tilin meńgerý basty qajettilikterdiń biri bolyp tabylady, – deidi Ótepbergen Orazǵaliev.
