Partiialarǵa Parlamentke ótýge múmkindik ulǵaitylady. Bul týraly búgin VII shaqyrylymdaǵy Parlamenttiń birinshi sessiiasynan keiin senator Áli Bektaev málim etti, dep habarlaidy "Ult aqparat".
«Prezidentimiz Qasym-Jomart Kemeluly Toqaev búgingi qos palatanyń birlesken otyrysynda óte mańyzdy baiandama jasady dep esepteimiz. Eń negizgisi – bizdiń tiimdi memleket jáne ádiletti qoǵam qurý saiasatynyń jalǵasatyndyǵyn basyp aitty. Bul óte mańyzdy másele. Sondyqtan da jalpy basqarý júiesin reformalaý, sot júiesin reformalaýǵa qatysty máselelerdiń jalǵasatyndyǵyn, sonymen birge, ásirese jergilikti ózin-ózi basqarýdy odan ári damytý máseleleri óte mańyzdy dep esepteimin. Shynynda da jergilikti jerlerdegi basqarý júiesi, sonyń ishinde qoǵamdyq basqarý júieleri, qoǵamdyq keńester, sonyń ishinde ákimshilik júiesiniń ózin de qaita qaraityn ýaqyt keldi. Halyqqa tiimdi organdar, tiimdi qoǵamdyq keńester jumys jasaýy kerek, ol birinshi másele», - dedi senator.
Onyń paiymynsha, aýmaqtardy damytýǵa qatysty óte bir mańyzdy basymdyqtar aityldy. Aýmaqtardyń barlyǵynyń teńgerimdi damýy jáne soǵan laiyqty qarjynyń bólinýi, aýmaqtardyń jol qurylysy, infraqurylymy birdei damý qajet ekendigi óte oryndy aityldy. Sebebi qazirgi ýaqytta bizdiń óńirlerde mysal úshin jol máselesiniń ózi ártúrli damyǵan, bir jerde jol jaqsy, bir jerde jol tipti de óte nashar, bir jerde aýyzsýmen qamtamasyz etilgen, ekinshi jerde aýyzsý tipti joq. Gazdandyrý máseleleri boiynsha da solai.
«Ásirese, aýmaqtyq, óńirlik jerlerde, aýyl-aimaqtarda osy halyqqa qajetti negizgi áleýmettik infraqurylymnyń damýyn bir deńgeide, bir dárejede damytý máselesi óte bir úlken problemaǵa ainalyp otyrǵandyǵy ras. Prezidenttiń búgingi sózinde aitylǵan máselelerdi biz tolyq qoldaimyz. Onyń baiandamasynda 3500-den astam aýyldyq eldi mekender qaita jańǵyrtylatyn boldy degen áńgime aityldy. Bul óte oryndy nárse. Eger aýyldyq eldi mekender qaitadan jańǵyrtylatyn bolsa, biz aýyldardy saqtap qalamyz. Soǵan laiyqty áleýmettik infraqurylym bolady. Óndiristik infraqurylymdy damytý da mańyzdy, sebebi óndiris bolmai, halyq turmaidy aýylda», - dedi depýtat.
Saiasi reformalarǵa toqtalǵan Á. Bektaev, aýyl ákimderin sailaý, artynan aýdan ákimderin sailaýǵa kóshý máselesi óte oryndy aitylǵanyn atap ótti.
«Taǵy bir aitylatyn másele, sailaýdan keiingi qorytyndyǵa bailanysty. Shynynda da biraz partiialar ótti, birazy óte almai qaldy, kóptegen jumystar atqaryldy, kóptegen usynystar aityldy, jaqsy sailaý aldy baǵdarlamalar qabyldandy, myqty azamattar kandidat bolyp tirkeldi. Parlamentke ótpei qalǵan partiialardyń ishindegi sol baǵdarlamaǵa engizilgen mańyzdy saiasi, ekonomikalyq, áleýmettik reformalarǵa qatysty usynystardyń bárin eskerý kerektigin, kelesi sailaýda Parlamentke ótý paiyzynyń deńgeiin 7%-dan 5%-ǵa deiin tómendetý máselesin mańyzdy dep esepteimin. Shynynda da partiialarǵa Parlamentke ótýge múmkindikti ulǵaitady. Iaǵni partiialar arasynda úlken básekelestik paida bolady, biylǵy sailaý da sony kórsetti. Sondyqtan Prezidentimizdiń baiandamasyndaǵy aitylǵan máseleler bizdiń elimizdi damytýǵa jolyndaǵy, memleketimizdi demokratiialandyrý jolyndaǵy, halqymyzdyń turmys-tirshiligin arttyrý jolyndaǵy óte mańyzdy jasalǵan qadam boldy dep esepteimin», - dedi Áli Bektaev.
