Memleket basshysy Qasym-Jomart Toqaev elimizde oryn alyp jatqan saiasi reformalarǵa qatysty pikir bildirdi, dep habarlaidy QazAqparat.
«Memleket basshysyna qatysty «Prezidentke qandai da bir saiasi partiia qatarynda bolýdyń qajeti joq» dep sheshim qabyldadym jáne bul tájiribe bolashaqta da qoldanysta bolatyn shyǵar. Iaǵni, qazirgi ýaqytta men partiia qatarynda emespin. Munyń ústine elimiz úshin mańyzdy Prezidenttiń jaqyn týystaryna qatysty norma engizildi. Jańa Konstitýtsiiaǵa sáikes olardyń memlekettik qyzmette laýazymda bolýyna jáne kvazimemlekettik sektorda, iaǵni memlekettik kompaniialarda basshylyq qyzmet atqarýǵa quqyǵy joq», - dedi QR Prezidenti reseilik jýrnalist Andrei Kondrashovqa bergen suhbatynda.
Memleket basshysynyń atap ótýinshe, qazirgi jaǵdaida biliktiń parlamenttik júiege kóshýi qisynsyz bolar edi.
«Bul irkilis pen qarama-qarsylyq júiesin kúsheite túsedi dep oilaimyn. Menińshe, bul - durys júie. Óitkeni, Qazaqstandaǵy azamattyq qoǵam tolysqan. Dál osy júiege suranys óte joǵary. Batystaǵy keibir belsendiler men baiqaýshylar úndep júrgen parlamenttik júiege kóshýge qatysty aitar bolsam, árine, men bul júieni halyqqa ýáde etkenim joq jáne óte kúrdeli geosaiasi jaǵdaida ol elimiz úshin jetkiliksiz dep sanaimyn. Prezidenttik respýblika, biraq, kúshti Parlamenti jáne esep beretin Úkimeti bar. Aitpaqshy, «Kúshti Prezident – yqpaldy Parlament – esep beretin Úkimet» formýlasyn Prezident laýazymyna kelmei turyp-aq usynǵan edim», - dedi Toqaev.
